ShahRukh Khan| బాలీవుడ్ స్టార్ హీరోలకు వరుసగా బెదిరింపులు రావడం కలకలం రేపుతోంది. ఇప్పటికే సల్మాన్ ఖాన్‌ను చంపేస్తామని బెదిరింపులు రాగా.. తాజాగా మరో అగ్ర హీరో షారుక్‌ ఖాన్‌(Shah Rukh Khan)కు బెదిరింపులు వచ్చాయి. కోట్ల రూపాయలు డబ్బులు ఇవ్వకపోతే చంపేస్తామంటూ ఓ నిందితుడి నుంచి బెదిరింపు కాల్ వచ్చింది. దీనిపై ముంబైలోని బాంద్రా పోలీస్‌ స్టేషన్‌లో కేసు నమోదైంది. కేసు నమోదుచేసుకున్న పోలీసులు దర్యాప్తు ముమ్మరం చేశారు. ఛత్తీస్‌గఢ్ రాష్ట్రం నుంచి ఈ బెదిరింపులు వచ్చినట్లు తేలింది.
ఇటీవల షారుక్‌ ఖాన్‌కు వచ్చిన ఫోన్ కాల్స్ ట్రేస్ చేయగా.. ఛత్తీస్‌గఢ్‌లోని రాయ్‌పూర్‌ నుంచి ఈ బెదిరింపులు వచ్చినట్లు దర్యాప్తులో గుర్తించారు. ఫైజాన్‌ ఖాన్‌ అనే వ్యక్తి ఈ బెదిరింపులకు పాల్పడినట్లు పోలీసులు అనుమానిస్తున్నారు. దీంతో నిందితుడి కోసం గాలింపు చేపట్టారు. కాగా ఇటీవల కృష్ణజింకలను వేటాడిన కేసు నేపథ్యంలో లారెన్స్ బిష్ణోయ్ గ్యాంగ్.. సల్మాన్ ఖాన్‌(Salman Khan)ను చంపేస్తామని బెదిరించింది. ఈ క్రమంలోనే సల్మాన్ సన్నిహితుడు, ఎమ్మెల్యే బాబా సిద్ధిఖీని హత్య చేశారు.
దీంతో సల్మాన్‌కు పోలీసులు భద్రతను పెంచారు. మరోవైపు సల్మాన్ కూడా రూ.2కోట్లు విలువైన బుల్లెట్ ప్రూఫ్ కారును కొనుగోలు చేశాడు. మూవీ షూటింగ్‌లతో పాటు బిగ్ బాస్‌ షూటింగ్‌లో కూడా నిరంతరం సల్మాన్ భద్రతను సెక్యూరిటీ సిబ్బంది పర్యవేక్షిస్తున్నారు. ఇదిలా ఉంటే మహారాష్ట్ర ఎన్నికలకు కొన్ని రోజులే మిగిలి ఉన్న నేపథ్యంలో షారుక్‌ ఖాన్‌కు కూడా బిదిరింపుల రావడం తీవ్ర చర్చనీయాంశంగా మారింది.