తెలంగాణలో ప్రభుత్వం మారిన నాటి నుంచి ఫోన్ ట్యాపింగ్ (Phone Tapping) వ్యవహారం హాట్ టాపిక్ గా మారింది. ఇప్పటివరకు అధికారులను మాత్రమే విచారించిన కేసు దర్యాప్తు బృందం.. తాజాగా ఓ రాజకీయ నేతకు నోటీసులు జారీ చేసింది. నకిరేకల్ బీఆర్ఎస్ మాజీ ఎమ్మెల్యే చిరుమర్తి లింగయ్య కు సోమవారం పోలీసులు నోటీసులు జారీ చేశారు. ఫోన్ ట్యాపింగ్ కేసులో విచారణకు హాజరు కావాలని నోటీసుల్లో పేర్కొన్నారు.
ఫోన్ ట్యాపింగ్ (Phone Tapping) కేసులో నిందితుడుగా ఉన్న తిరుపతన్నతో చిరుమర్తి లింగయ్య ఫోన్ కాంటాక్ట్ లో ఉన్నారని పోలీసులు గుర్తించినట్లు తెలుస్తోంది. ఈ క్రమంలోనే ఆయనకు నోటీసులు పంపిన అధికారులు.. నేడు జూబ్లీహిల్స్ ఏసీపీ ఎదుట విచారణకు హాజరు కావాలని స్పష్టం చేశారు. మరోవైపు ఈ కేసులో ప్రధాన నిందితుడుగా ఉన్న ఎస్ఐబి మాజీ చీఫ్ ప్రభాకర్ రావు అమెరికాలో శాశ్వత నివాసానికి వీలు కల్పించే గ్రీన్ కార్డు దక్కించుకున్నారు. దీంతో ఈ కేసు వ్యవహారం రోజుకో మలుపు తిరుగుతోంది.