అణగారిన వర్గాల సమస్యలపై రాజీలేని పోరాటాలు చేసిన నిస్వార్ద కమ్యూనిస్టు నాయకులు వేజేళ్ల సైదులు రావు అని సిపిఎం జిల్లా కార్యదర్శి వర్గ సభ్యులు కందునూరి శ్రీనివాస్, మండా రాజన్నలు అన్నారు. మండలంలోని సత్యనారాయణ పురం క్రాస్ రోడ్డులో సిపిఎం అధ్వర్యంలో సిపియం సినియర్ నాయకులు సైదులు రావు 22వ వర్ధంతిని బుధవారం ఘనంగా నిర్వహించారు.
ఈ సందర్భంగా సైదులు రావు చిత్ర పటానికి పూల మాలలు వేసి ఘనంగా నివాళులు అర్పించారు. అనంతరం మండల కార్యదర్శి అలవాల సత్యవతి అధ్యక్షతన జరిగిన వర్ధంతి సభలో వారు మాట్లాడుతూ ఉన్నత కుటుంబంలో జన్మించిన సైదులు రావు బయ్యారం-గార్ల మండలాలలో ప్రతి పేద కుటుంబానికి అండగా నిలిచి వారి సమస్యల పరిష్కారానికి నిరంతరం కృషి చేస్తూ ఇల్లందు డివిజన్ నాయకులుగా పని చేశారని చెప్పారు. బ్యాడ్మింటన్ జిల్లా క్రీడాకారుడుగా ఉంటూనే సత్యనారాయణపురం గ్రామంలో బూర్జువా, భూ స్వామ్యవర్గాలు చేస్తున్న దోపిడీలను, అరాచకాలపై వ్యవసాయ కూలీలు, ప్రజలను సమీకరించి పోరాటాలు చేశారని అన్నారు.
సిపిఎం, ప్రజా సంఘాల శిక్షణ తరగతులను సొంత ఖర్చులతో నిర్వహించి, తుదిశ్వాస వరకూ ఎర్రజెండాను వీడలేదని సైదులు రావు చేసిన ప్రజా సేవలను కొనియాడారు. సైదులు రావు సతీమణి కరణమ్మ ప్రతి సంవత్సరం వర్ధంతి సందర్భంగా అల్పాహారం అందించడం వారికి కమ్యూనిస్టు పార్టీ సిద్ధాంతం పట్ల ఉన్న నిబద్ధతను తెలియపరుస్తుందని అన్నారు. సైదులు రావు ఆశయాలను భావితరాలకు అందిస్తూ కేంద్ర, రాష్ట్ర ప్రభుత్వాలు అనుసరిస్తున్న ప్రజా, కార్మిక వ్యతిరేక విధానాలపై పోరాటాలు చేయడమే సైదులు రావుకు ఇచ్చే నిజమైన నివాళులు అన్నారు.
ఈ కార్యక్రమంలో సిపిఎం బయ్యారం మండల కార్యదర్శి నంబూరి మధు బాబు, జక్కసత్యం, అంబటి వీరస్వామి, నాగరాజు, మల్లయ్య, సర్వర్, ప్రవీణ్ కుమార్, వై. వెంకటేశ్వర్లు, లక్ష్మణ్, రమేష్, బుజ్జి,బయ్యారం మండల నాయకులు మోహన్, కార్యకర్తలు తదితరులు పాల్గొన్నారు.