CM Chandrababu| ఏపీకి పోలవరం(Polavaram) ప్రాజెక్టు గేమ్ ఛేంజర్ కానుందని సీఎం చంద్రబాబు తెలిపారు. అసెంబ్లీలో రాష్ట్రంలోని సాగునీటి ప్రాజెక్టులపై స్వల్ప కాలిక చర్చ జరిగింది. ఈ సందర్భంగా చంద్రబాబు ప్రాజెక్టుల స్థితిగతులపై సభ్యులకు పవర్ పాయింట్ ప్రజంటేషన్ ఇచ్చారు. అనంతరం ఆయన మాట్లాడుతూ గత ప్రభుత్వం నిర్వాహకంపై విమర్శలు గుప్పించారు. వైసీపీ ప్రభుత్వంలోని జలవనరుల శాఖ మంత్రికి టీఎంసీకి, క్యూసెక్కులకు తేడా తెలియదని సెటైర్లు వేశారు. అసెంబ్లీ సాక్షిగా పోలవరం గురించి అడిగితే పర్సెంటా, హాఫ్ పర్సెంటా అని హేళనగా మాట్లాడారని మండిపడ్డారు.
గత ప్రభుత్వం పోలవరం ప్రాజెక్టుకు సంబంధించి కేవలం 3.08 శాతం పనులే చేసిందని.. కేవలం రూ.4,099 కోట్లు మాత్రమే ఖర్చె పెట్టిందని విమర్శించారు. అదే తమ ప్రభుత్వం 2014-19 మధ్య కాలంలో పోలవరం ప్రాజెక్టుపై రూ.16,493 కోట్లు ఖర్చు చేసిందని వివరించారు. ఏపీకి అమరావతి, పోలవరం రెండు కళ్లు లాంటివి అని అభివర్ణించారు. పోలవరం ప్రాజెక్టును రాష్ట్రానికి గేమ్ ఛేంజర్ కానుందని పేర్కొన్నారు.
ఏపీకి జీవనాడి వంటి పోలవరం ప్రాజెక్టును కేంద్ర ప్రభుత్వం జాతీయ ప్రాజెక్టుగా ప్రకటించిందన్నారు. ఇందుకోసం రెండేళ్లలో రూ.12,157 కోట్లు ఇచ్చేందుకు అంగీకరించిందని తెలిపారు. అలాగే పోలవరం ప్రాజెక్టు ఎత్తు కచ్చితంగా 45.72 మీటర్లు ఉంటుందని స్పష్టం చేశారు. జనవరి నుంచి కొత్త డయాఫ్రం వాల్ నిర్మాణం ప్రారంభమవుతుందని.. 2026 మార్చి లోపు దీనిని పూర్తి చేస్తామన్నారు. 2027లోపు పోలవరం ప్రాజెక్టును పూర్తి చేస్తామని చంద్రబాబు వెల్లడించారు.