Vladimir Putin| రష్యా అధ్యక్షుడు వ్లాదిమిర్‌ పుతిన్ త్వరలోనో భారత్‌లో పర్యటించనున్నారని క్రెమ్లిన్‌ ప్రెస్‌ సెక్రటరీ దిమిత్రీ పెస్కోవ్‌ వెల్లడించారు. అయితే ఈ పర్యటనకు సంబంధించిన తేదీలు ఇంకా ఖరారు కాలేదన్నారు. పర్యటన తేదీలపై ఇరు దేశాల అధికారుల మధ్య సంప్రదింపులు జరుగుతున్నాయని పేర్కొన్నారు. అయితే వచ్చే ఏడాదిలోనే పుతిన్ ఇండియాకు వచ్చే అవకాశాలు ఉన్నట్లు తెలుస్తోంది.
కాగా రష్యాలో ఇటీవల జరిగిన 16వ బ్రిక్స్‌ సదస్సులో భారత ప్రధాని నరేంద్ర మోదీ పాల్గొన్న సంగతి తెలిసిందే. ఈ సదస్సులో రష్యా అధ్యక్షుడు పుతిన్‌తో మోదీ భేటీ అయ్యారు. ఈ సందర్భంగా జరిగిన చర్చల సమయంలో భారత్‌లో పర్యటించాలని పుతిన్‌ను మోదీ ఆహ్వానించిన విషయం విధితమే. రష్యా-ఉక్రెయిన్‌ యుద్ధంపై ఆందోళనలు, అంతర్జాతీయ పరిణామాల నేపథ్యంలో భారత్‌లో పుతిన్ పర్యటిస్తారనే వార్తలు ప్రాధాన్యం సంతరించుకున్నాయి.