Lagcharla: లగచర్ల భూసేకరణ నోటిఫికేషన్‌ను ప్రభుత్వం ఉపసంహరించుకుంది. ఫార్మా విలేజ్‌ల కోసం ఇచ్చిన భూసేకరణ నోటిఫికేషన్‌ను ఉపసంహరించుకుంటున్నట్లు ప్రభుత్వం ఉత్తర్వులు జారీ చేసింది. కాగా ఆగస్టు 1న లగచర్లలోని 580 మంది రైతులకు చెందిన 632 ఎకరాల భూసేకరణ నోటిఫికేషన్‌ను విడుదల చేసింది.
కాగా కొడంగల్ నియోజకవర్గంలోని పలు మండలాల్లో ఫార్మా కంపెనీకి ప్రభుత్వం ముంకొచ్చిన సంగతి తెలిసిందే. ఈ కంపెనీకి భూసేకరణ కోసం జిల్లా కలెక్టర్, అధికారులు రైతులతో చర్చలు జరిపారు. ఈ క్రమంలో కొందరు లగచర్ల రైతులు కలెక్టర్‌పై రాళ్ల దాడి చేయడం సంచలనం సృష్టించిన విషయం విధితమే. ఈ ఘటనలో పలువురిని పోలీసులు అరెస్ట్ చేశారు. ఈ దాడి వెనక బీఆర్ఎస్ నేతల హస్తం ఉందని పోలీసులు తెలిపారు. అయితే సీఎం రేవంత్ రెడ్డి అల్లుడు కంపెనీకి చౌకగా భూములు కట్టబెట్టడానికి ప్రభుత్వం ప్రయత్నిస్తోందంటూ మాజీ మంత్రులు కేటీఆర్, హరీష్‌ రావు ఆరోపిస్తున్నారు. ఈ నేపథ్యంలో ప్రభుత్వం భూసేకరణ నోటిఫికేషన్ ఉపసంహరించుకోవడం తీవ్ర చర్చనీయాంశంగా మారింది.
