Team India| ఆస్ట్రేలియా పీఎం(PMXI) ఎలెవన్‌తో జరిగిన వార్మప్‌ మ్యాచ్‌లో భారత్ 6 వికెట్ల తేడాతో ఘన విజయం సాధించింది. వర్షం కారణంగా ఈ మ్యాచ్‌ను 50 ఓవర్లకు కుదించారు. అయితే మ్యాచ్ ప్రారంభమైన కొద్దిసేపటికే వరుణుడు అంతరాయం కలిగించడంతో 46 ఓవర్లకు కుదిస్తూ నిర్ణయం తీసుకున్నారు.
టాస్ ఓడి తొలుత బ్యాటింగ్ చేసిన ఆస్ట్రేలియా పీఎం ఎలెవన్‌ 43.2 ఓవర్లలో 240 పరుగులకు ఆలౌటైంది. ఓపెనర్‌ సామ్ కాన్స్‌టస్‌ (107; 97 బంతుల్లో 14 ఫోర్లు, 1 సిక్స్‌)తో అదరగొట్టాడు. ఇక తొమ్మిదో స్థానంలో వచ్చిన హన్నో జాకబ్స్(61; 61 బంతుల్లో 4 ఫోర్లు, 2 సిక్స్‌లు), జాక్ క్లేటన్ (40; 52 బంతుల్లో 6 ఫోర్లు) రాణించారు. భారత బౌలర్లతో హర్షిత్ రాణా 4 వికెట్లు, ఆకాశ్ దీప్‌ 2, సిరాజ్‌, ప్రసిద్ధ్‌ కృష్ణ, వాషింగ్టన్ సుందర్‌, రవీంద్ర జడేజా తలో వికెట్ పడగొట్టారు
ఇక 241 పరుగుల లక్ష్యాన్ని భారత్ 42.5 ఓవర్లలో 4 వికెట్లు మాత్రమే కోల్పోయి ఛేదించింది. ఓపెనర్లు యశస్వి జైస్వాల్ (45; 59 బంతుల్లో 9 ఫోర్లు), కేఎల్ రాహుల్ (27 రిటైర్డ్ హర్ట్; 44 బంతుల్లో 4 ఫోర్లు) శుభారంభం అందించారు. అనంతరం వచ్చిన శుభ్‌మన్ గిల్ (50 రిటైర్డ్ హర్ట్; 62 బంతుల్లో 7 ఫోర్లు), నితీశ్‌ కుమార్‌ రెడ్డి (42; 32 బంతులలో 5 ఫోర్లు, 1 సిక్స్‌), వాషింగ్టన్ సుందర్‌ (42*; 36 బంతుల్లో 5 ఫోర్లు), రవీంద్ర జడేజా (27; 31 బంతుల్లో) రాణించారు.
అయితే నాలుగో స్థానంలో వచ్చిన కెప్టెన్ రోహిత్ (3) మాత్రం నిరాశపర్చాడు. కోహ్లీ అయితే బ్యాటింగ్‌కు దిగలేదు. ఆస్ట్రేలియా పీఎం ఎలెవన్‌ బౌలర్లలో చార్లీ ఆండర్సన్ 2, లాయిడ్ పోప్, రెన్‌షా చెరో వికెట్ తీశారు. కాగా డిసెంబరు 6 నుంచి భారత్, ఆస్ట్రేలియా జట్ల మధ్య రెండో (పింక్ బాల్)టెస్టు ప్రారంభంకానుంది. డే/నైట్‌ పద్ధతిలో జరగనున్ను ఈ మ్యాచ్‌కు అడిలైడ్‌ ఓవల్‌ గ్రౌండ్ వేదిక కానుంది.
