TaJ Mahal| దేశంలో బాంబు బెదిరింపులు ఆగడం లేదు. మొన్నటి వరకు విమానాశ్రయాలతో పాటు విమానాలకు వరుసగా బాంబు బెదిరింపులు(Bomb threats) వచ్చిన సంగతి తెలిసిందే. తాజాగా ప్రఖ్యాత కట్టడాలకు ఈ బెదిరింపులు మొదలయ్యాయి. ప్రపంచంలోని ఏడు వింతల్లో ఒక్కటైన తాజ్ మహల్‌ను పేల్చేస్తామంటూ వార్నింగ్ మెసేజ్ వచ్చింది. గుర్తు తెలియని ఖాతా నుంచి ఉత్తరప్రదేశ్‌(UttarPradesh) టూరిజం కార్యాలయానికి తాజ్ మహల్‌ను పేల్చేస్తామంటూ ఈమెయిల్ వచ్చింది.
దీంతో వెంటనే అప్రమత్తమైన అధికారులు పోలీసులకు సమాచారం అందించారు. హుటాహుటిన బాంబు స్క్వాడ్, డాగ్ స్క్వాడ్, ఇతర పోలీసు బృందాలతో విస్తృత తనిఖీలు చేపట్టారు. దాదాపు నాలుగు గంటల పాటు జరిపిన ఈ తనిఖీల్లో ఎలాంటి అనుమానాస్పద వస్తువులు కనిపించకపోవడంతో ఊపిరి పీల్చుకున్నారు. తాజ్‌మహల్‌ చుట్టూ భద్రతను మరింత పెంచినట్లు ఏసీపీ సయీద్‌ అరీబ్‌ అహ్మద్‌ వెల్లడించారు. ఈ మెయిల్‌ ఎక్కడి నుంచి వచ్చిందన్న దానిపై దర్యాప్తు చేస్తున్నామని ఆయన తెలిపారు.
