Bigg Boss 8: కొన్ని నెలలుగా స్టార్ మాటీవీలో ప్రసారమవుతున్న ‘బిగ్‌బాస్-8’ సీజన్‌ నేటితో ముగియనుంది. దాదాపు వంద రోజులపాటు ప్రేక్షకులను ఎంటర్‌టైన్ చేసిన ఈ రియాలిటీ షో విన్నర్‌ ఎవరో నేడు తేలిపోనుంది. దీంతో జూబ్లీహిల్స్‌లోని అన్నపూర్ణ స్టూడియో వద్ద పోలీసులు భద్రతను కట్టుదిట్టం చేశారు. గత సీజన్‌లో జరిగిన ఘటనలను దృష్టిలో పెట్టుకుని ముందుజాగ్రత్త చర్యల్లో భాగంగా 300 మంది పోలీసులతో భారీ బందోబస్తు ఏర్పాటు చేస్తున్నారు.
కాగా గతేడాది డిసెంబర్ 17న ముగిసిన బిగ్‌బాస్-7లో పల్లవి ప్రశాంత్ విజేతగా నిలిచిన సంగతి తెలిసిందే. అయితే ప్రశాంత్ స్టూడియో నుంచి బయటకు వచ్చిన తర్వాత ఆయన అభిమానులు అత్యుత్సాహం ప్రదర్శించారు. బస్సులు, కార్ల అద్దాలు ధ్వంసం చేశారు. ఈ కేసులో పల్లవి ప్రశాంత్‌ను పోలీసులు అరెస్ట్ కూడా చేశారు. ఈ పరిణామాల నేపథ్యంలో ఈసారి అలాంటి ఘటనలు జరగకుండా పోలీసులు చర్యలు చేపట్టారు.
ఇదిలా ఉంటే ఈ సీజన్‌లో మొత్తం 22 మంది కంటెస్టెంట్లు పాల్గొన్నారు. ఇందులో ఐదుగురు ఫైనల్‌కు చేరుకున్నారు. నిఖిల్‌, ప్రేరణ, గౌతమ్‌, నబీల్‌, అవినాష్‌ టైటిల్ కోసం పోటీపడుతున్నారు. అయితే టైటిల్ రేసులో గౌతమ్‌, నిఖిల్‌ ఉన్నట్లు సమాచారం. మరి విజేత ఎవరనేది మరికొన్ని గంటల్లోనే తేలిపోనుంది.
