ఏపీలో ఆర్టీసీ బస్సుల్లో మహిళలకు ఉచిత బస్సు(Free Buse Scheme) ప్రయాణ పథకంపై మంత్రుల కమిటీని ఏర్పాటు చేస్తూ ప్రభుత్వం ఉత్తర్వులు జారీ చేసింది. ఇతర రాష్ట్రాల్లో ఈ పథకంపై అధ్యయనం చేసి సిఫారసు చేయాలని కమిటీకి సూచించింది. రవాణాశాఖ మంత్రి రామ్‌ప్రసాద్‌రెడ్డి సారథ్యంలో ఏర్పాటు చేసిన కమిటీలో కన్వీనర్‌గా రవాణాశాఖ ముఖ్యకార్యదర్శి, సభ్యులుగా మంత్రులు వంగలపూడి అనిత, గుమ్మడి సంధ్యారాణికి చోటు కల్పించింది.
కాగా ఎన్డీయే కూటమి ఎన్నికల సమయంలో మహిళలకు ఉచిత బస్సు పథకం హామీ ఇచ్చిన సంగతి తెలిసిందే. కూటమి ప్రభుత్వం అధికారంలోకి రావడంతో రాష్ట్రంలోని మహిళలు ఈ పథకం అమలు కోసం ఎప్పుడెప్పుడా అని ఎదురు చూస్తున్నారు. మరోవైపు ప్రతిపక్షాలు కూడా ఉచిత బస్సు పథకం ఎప్పడు అమలు చేస్తారని ప్రభుత్వాన్ని ప్రశ్నిస్తున్నారు. ఈ నేపథ్యంలో సీఎం చంద్రబాబు(CM Chandrababu) దీనిపై ప్రత్యేక దృష్టి పెట్టారు. ఈ క్రమంలోనే విధివిధానాల రూపకల్పనకు కేబినెట్ సబ్ కమిటీని ఏర్పాటు చేస్తూ నిర్ణయం తీసుకున్నారు.
