హైదరాబాద్ నగర పోలీసుల అత్యున్నత సమీక్షా సమావేశం సీపీ సి.వి.ఆనంద్ అధ్యక్షతన జరిగింది. ఈ సమావేశానికి అడిషనల్ డీసీపీ, ఇతర ఉన్నత ర్యాంకుల అధికారులు హాజరయ్యారు. ప్రజా భద్రత, పాలనాపరమైన అంశాలపై సమావేశంలో చర్చించారు. ఈ సందర్భంగా సీపీ ఆనంద్ మాట్లాడుతూ పెండింగ్ కేసులు, వాటి విచారణ, చార్జీ షీటుల పరిస్థితిని తెలుసుకున్నారు. వాటిపై ప్రత్యేక శ్రద్ధ వహించాలని డీసీపీలకు సూచించారు. అదే విధంగా డ్రోన్స్, సీసీటీవీ కెమెరాల నిర్వహణ, మరమ్మత్తుల కోసం డి-సిఎఎంఓ (డ్రోన్స్ అండ్ కెమెరాస్ మెయింటెనన్స్ ఆర్గనైజేషన్) పరిచయం చేశామన్నారు. వేరే సంస్థ ద్వారా సీసీటీవీలు ఎక్కడెక్కడ పనిచేయడం లేదు, ఎక్కడ అవసరం అనే వాటిపై సర్వే చేయిస్తామన్నారు.
నేరాల నియంత్రణలో సీసీటీవీల పాత్రను ప్రజలకు వివరించాలని సూచించారు. ఆన్ లైన్ వ్యవస్థల పనితీరు ఆశాజనకంగా ఉండడంతో ఆయుధాల లైసెన్స్ లను కూడా ప్రజా సౌకర్యార్థం ఆన్ లైన్ చేయాలని ఐటీ విభాగాన్ని ఆదేశించినట్లు వెల్లడించారు. హోళి, షబ్ ఏ భారత్, రంజాన్, శ్రీరామ నవమి, హనుమాన్ జయంతిల నేపథ్యంలో కమ్యూనల్, రౌడీ షీటర్లను బైండోవర్ చేయాలని, పీస్ కమిటీల్లో ఎక్కువ మంది యువత ఉండేలా చూడాలని తెలిపారు. ఫిట్ కాప్ కార్యక్రమ నిర్వహణ కోసం మరిన్ని ప్రణాళికలు రూపొందించాలని డీసీపీలకు తెలియజేశారు.
