కాంగ్రెస్ ప్రభుత్వం పాలనపై బీఆర్ఎస్ వర్కింగ్ ప్రెసిడెంట్ కేటీఆర్(KTR) మరోసారి తీవ్ర ఆగ్రహం వ్యక్తం చేశారు. కాంగ్రెస్ పార్టీ ఇచ్చిన ఎన్నికల హామీలపై ఎక్స్ వేదికగా ప్రశ్నించారు.
“ఏడాది కాంగ్రెస్ పాలనలో కటింగ్‌లు, కటాఫ్స్.. తెలంగాణకు ఒరిగింది ఏమీ లేదు. రైతులకు రుణమాఫీ, రైతు భరోసా, సాగు నీళ్లలోనూ కోత పెట్టారు. గర్భిణులకు కేసీఆర్ కిట్, న్యూట్రిషన్ కిట్‌ను సైతం ఇవ్వడం లేదు. మహిళలకు తులం బంగారం, రూ.2,500 కోత పెట్టారని, ఆసరా ఫింఛన్లు రూ.4 వేలు, రూ.5 లక్షల విద్యా భరోసా కార్డు, జాబ్ క్యాలెండర్, ఏడాదిలో 2లక్షల ఉద్యోగాలు, విద్యార్థులకు ఎలక్ట్రిక్ స్కూటీలు.
అమరవీరులకు రూ.25వేల పింఛను, ఉద్యమకారులకు 250 గజాల స్థలం, రైతులకు రూ.3 లక్షల వడ్డీ లేని రుణాలు, భూమి లేని రైతులకు సైతం రైతు బీమా ఎక్కడ పోయాయి. నిరుద్యోగ యువతకు రూ.4 వేల భృతి, ఎస్సీ, ఎస్టీ కుటుంబాలకు రూ.12 లక్షల ఆర్థిక సాయం, ఆశా కార్యకర్తలకు రూ.18 వేల వేతనం, మధ్యాహ్న భోజన కార్మికుల వేతనం రూ.10 వేలకు పెంపు అనేవి కల్లలుగానే మిగిలాయి.
ఆఖరుకు ఇందిరమ్మ ఇళ్లకు కటాఫ్. పేదలకు ఇచ్చే ఇందిరమ్మ ఇండ్లకు కటాఫ్ ఎందుకు..?అర్హులైన ప్రతి పేదవాడికి సొంత ఇళ్లు కట్టించి ఎందుకు ఇవ్వరు? డబుల్ బెడ్రూంలకు మూడు రంగులు వేసి మురిపిస్తున్న కాంగ్రెస్ సర్కార్. జాగో తెలంగాణ జాగో” అని తీవ్ర విమర్శలు చేశారు.
