ప్రపంచంలోనే అతిపెద్ద ఆధ్యాత్మిక కార్యక్రమం మహా కుంభమేళా(Maha Kumbh Mela)కు భక్తులు పోటెత్తుతున్నారు. ఉత్తర్‌ప్రదేశ్‌లోని ప్రయాగ్‌రాజ్‌లో జరుగుతున్న ఈ వేడుకకు ఇప్పటికే కోట్లాది మంది భక్తులు తరలివచ్చారు. నాగసాధువులు, అఘోరాలతో పాటు సాధారణ భక్తులు కూడా అక్కడికి వచ్చి స్వామివారిని దర్శించుకుంటున్నారు. దీంతో ఆ ప్రాంతమంతా భక్తి పారవశ్యంతో వర్థిల్లుతోంది. తాజాగా ఈ కుంభమేళాకు సంభించిన స్పేస్ వ్యూ చిత్రాలను భారత అంతరిక్ష పరిశోధన సంస్థ(ISRO) విడుదల చేసింది. తాత్కాలికంగా నిర్మించిన టెంట్ హౌస్‌లు, ఫ్లోటింగ్ బ్రిడ్జ్‌ల ఏర్పాటు చేయడంతో గత కొన్ని నెలల ముందుకు, ఇప్పటికీ మధ్య తేడా ఫొటోల్లో స్పష్టంగా తెలుస్తోంది.
2024 ఏప్రిల్ 6వ తేదీ ఫొటోలో ఆ ప్రాంతమంతా ఖాళీగా కనిపించింది. 2024డిసెంబర్ 22, 2025 జనవరి 10న తీసిన చిత్రాల్లో వివిధ మౌలిక సదుపాయాలతో పాటు అక్కడి శివాలయ పార్క్ కూడా దర్శనమిచ్చింది. భారతదేశం మ్యాప్‌లా ఆ పార్క్ కనిపించడం విశేషం. ఇదిలా ఉంటే జనవరి 13 నుంచి ఫిబ్రవరి 26 వరకు 45 రోజుల పాటు జరగనున్న మహాకుంభమేళాలో 40కోట్ల మందికిపైగా భక్తులు పుణ్యస్నానాలు ఆచరించనున్నారని అంచనా వేస్తున్నారు. ఇక ఈ వేడుక ద్వారా ఉత్తరప్రదేశ్‌ రాష్ట్ర ఆర్థికవ్యవస్థకు రూ.2లక్షల కోట్ల మేర ఆదాయం సమకూరనుందని ట్రేడింగ్ వర్గాలు చెబుతున్నాయి. అలాగే 12 లక్షల మందికి తాత్కాలిక ఉపాధి కూడా లభిస్తుందని వెల్లడించాయి.
