కోల్‌కతాలోని ఈడెన్ గార్డెన్స్ వేదికగా ఇంగ్లాండ్ తో జరిగిన తొలి టీ20లో టీమిండియా ఘన విజయం సాధించింది. ఇంగ్లండ్ నిర్దేశించిన 133 పరుగుల లక్ష్యాన్ని టీమిండియా కేవలం 12.5 ఓవర్లలోనే మూడు వికెట్లు కోల్పోయి ఛేదించింది. ఓపెనింగ్ బ్యాట్స్‌మెన్‌గా వచ్చిన అభిషేక్ శర్మ ఇంగ్లండ్ బౌలర్లను ఆడుకున్నాడు. 34 బంతుల్లో 79 పరుగులు చేసి ఆకాశమే హద్దుగా చెలరేగాడు. అభిషేక్ ఇన్నింగ్స్ లో 5 ఫోర్లు, 8 సిక్సులు ఉన్నాయి. లక్ష్యాన్ని ఛేదించిన భారత్‌కు శుభారంభం లభించింది. అభిషేక్, సంజు శాంసన్ లు తొలి వికెట్‌కు 41 పరుగులు జోడించారు.
అయితే ఐదో ఓవర్లో ఈ భాగస్వామ్యానికి బ్రేక్ పడింది. నిలకడగా ఆడుతున్న సంజు 26 పరుగుల వ్యక్తిగత స్కోర్ వద్ద ఔట్ అయ్యాడు. అనంతరం వచ్చిన కెప్టెన్ సూర్యకుమార్ యాదవ్ డకౌట్ అయ్యాడు. జోఫ్రా ఆర్చర్ బౌలింగ్ లో సూర్య ఔట్ అయ్యాడు. దీంతో 41 పరుగులకే భారత్ రెండు వికెట్లు కోల్పోయింది. అయితే అభిషేక్, తిలక్ వర్మలు ఇంగ్లండ్ బౌలర్లను సమర్థవంతంగా ఎదుర్కొని స్కోర్ బోర్డును పరుగులు పెట్టించారు. చివర్లో అభిషేక్ ఔట్ అయ్యాడు. తిలక్ వర్మ 19 పరుగులతో నాటౌట్‌గా నిలిచాడు. హార్దిక్ పాండ్యా 3 పరుగులతో నాటౌట్‌గా నిలిచాడు. భారత్ 12.5 ఓవర్లలో లక్ష్యాన్ని ఛేదించింది. ఇంగ్లండ్ బౌలర్లలో జోఫ్రా రెండు వికెట్లు తీశాడు.
అంతకుముందు భారత్ టాస్ గెలిచి బౌలింగ్ ఎంచుకుని ఇంగ్లండ్‌ను 20 ఓవర్లలో 132 పరుగులకే పరిమితం చేసింది. కెప్టెన్ జోస్ బట్లర్ అత్యధిక పరుగులు చేశాడు. 44 బంతుల్లో 8 ఫోర్లు, 2 సిక్సర్ల సాయంతో 48 పరుగులు చేశాడు. హ్యారీ బ్రూక్ 17 పరుగులు, జోఫ్రా ఆర్చర్ 12 పరుగులు చేశారు. బెన్ డకెట్ (4), జాకబ్ బెతెల్ (7) సహా ఆరుగురు ఆటగాళ్లు రెండంకెల స్కోరుకు చేరుకోలేదు. ఫిల్ సాల్ట్, లియామ్ లివింగ్‌స్టోన్ ఖాతాలు తెరవలేదు.
భారత్ తరపున స్పిన్నర్ వరుణ్ చక్రవర్తి 23 పరుగులిచ్చి 3 వికెట్లు తీశాడు. అర్ష్‌దీప్ సింగ్, అక్షర్ పటేల్, హార్దిక్ పాండ్యా రెండేసి వికెట్లు తీశారు. అంతర్జాతీయ టీ20ల్లో అత్యధిక వికెట్లు తీసిన భారత బౌలర్‌గా అర్ష్‌దీప్ (97) నిలిచాడు. ఈ విజయంతో ఐదు టీ20ల సిరీస్‌లో భారత్ 1-0 ఆధిక్యంలో నిలిచింది. కీలక వికెట్లు తీసి ఇంగ్లండ్ నడ్డి విరిచిన వరుణ్ చక్రవర్తి మ్యాన్ ఆఫ్ ది మ్యాచ్ గా నిలిచాడు.
