స్టార్ హీరో విశాల్(Vishal)కు తమిళంతో పాటు తెలుగులోనూ మంచి గుర్తింపు ఉంది. ఆయన నటించిన చిత్రాలు తెలుగులోనూ విడుద‌లవుతూ ఉంటాయి. కొన్ని చిత్రాలు అయితే సూపర్ హిట్ కూడా అయ్యాయి. తాజాగా మరో చిత్రంతో తెలుగు అభిమానులను పలకరించేందుకు సిద్ధమయ్యాడు. ఇటీవ‌ల సంక్రాంతి కానుకగా ఆయన నటించిన ‘మ‌ద‌గ‌జ‌రాజా'(Madha Gaja Raja) చిత్రం త‌మిళంలో ప్రేక్ష‌కుల ముందుకు వ‌చ్చి భారీ విజ‌యాన్ని సొంతం చేసుకుంది. ఇప్పుడు తెలుగులోనూ జ‌న‌వ‌రి 31న ఈ చిత్రాన్ని రిలీజ్ చేయనున్నారు.
ఈ సందర్భంగా మూవీ యూనిట్ ట్రైలర్‌ను విడుదల చేసింది. విక్టరీ వెంకటేష్ ఈ ట్రైలర్ రిలీజ్ చేయడం విశేషం. ట్రైలర్‌లో విశాల్ యాక్షన్, సంతానం కామెడీ ఆకట్టుకుంటున్నాయి. ఇక ఈ సినిమాలో వ‌రల‌క్ష్మీ శ‌ర‌త్‌కుమార్‌, అంజ‌లి(Anjali), సంతానం, సోనూసూద్, మనోబాల కీలక పాత్ర‌లు పోషించారు. జెమినీ ఫిలిం సర్క్యూట్ నిర్మించిన ఈ సినిమాకు సుందర్ సి ద‌ర్శ‌క‌త్వం వ‌హించారు. వాస్త‌వానికి ఈ చిత్రం 2013లోనే విడుదల కావాల్సి ఉండగా అనివార్య కారణాల వల్ల వాయిదా పడింది. 12 ఏళ్ల త‌రువాత ప్రేక్ష‌కుల ముందుకు వ‌చ్చింది.
