భారత స్టార్ బౌలర్ జస్‌ప్రీత్‌ బుమ్రా(Jasprit Bumrah)ప్రతిష్టాత్మక ఐసీసీ క్రికెటర్ ఆఫ్ ది ఇయర్‌-2024(ICC Cricket of The Year) అవార్డుకు ఎంపికయ్యాడు. ఈ పురస్కారం కోసం బుమ్రాతో పాటు జో రూట్, హ్యారీ బ్రూక్‌ , ట్రావిస్‌ హెడ్‌ పోటీపడ్డారు. చివరకు బుమ్రాను ఈ అవార్డు వరించింది. దీంతో ఐసీసీ క్రికెటర్ ఆఫ్ ది ఇయర్‌ అవార్డు గెలిచిన తొలి భారత పేసర్‌గా రికార్డు సృష్టించాడు. అంతకుముందు భారత క్రికెటర్లు రాహుల్ ద్రవిడ్ (2004), సచిన్ టెండూల్కర్ (2010), రవిచంద్రన్ అశ్విన్ (2016), విరాట్ కోహ్లీ (2017, 2018) ఈ పురస్కారానికి ఎంపికయ్యారు.
ఇదిలా ఉంటే బుమ్రా టెస్టు క్రికెటర్ ఆఫ్ ది ఇయర్‌ 2024గానూ నిలిచాడు. గతేడాది టెస్టుల్లో బుమ్రా అద్భుతమైన బౌలింగ్‌తో ఆకట్టుకున్నాడు. 13 మ్యాచ్‌ల్లో 71 వికెట్లు పడగొట్టాడు. ఈ క్రమంలోనే 2024లో టెస్టుల్లో అత్యధిక వికెట్లు తీసిన బౌలర్‌గా రికార్డు సృష్టించాడు.
