ఉత్తరప్రదేశ్‌ (Uttarpradesh) ప్రయాగ్‌రాజ్‌ (Prayagraj) లో జరుగుతున్న మహా కుంభమేళాకు భారీగా భక్తులు తరలి వస్తున్నారు. దేశ విదేశాల నుంచి వస్తున్న భక్తులు.. పవిత్ర స్నానం చేసి తరిస్తున్నారు. ఇక బుధవారం మౌని అమావాస్య కావడంతో రికార్డు స్థాయిలో భక్తులు పవిత్ర స్నానం చేసినట్లు తెలుస్తోంది. ఈ ఒక్కరోజే సాయంత్రం నాలుగు గంటల వరకే ప్రయాగ్‌రాజ్‌ లోని త్రివేణి సంగమంలో అమృతస్నానాలు చేసిన భక్తుల సంఖ్య 6 కోట్లు దాటింది. దాంతో త్రివేణి సంగమంలోని ఘాట్‌లు అన్ని కిటకిటలాడుతున్నాయి. ఇవాళ మొత్తంగా కుంభమేళాకు వచ్చే భక్తుల సంఖ్య 8 కోట్లు దాటవచ్చునని అంచనా వేస్తున్నారు.
ఇదిలా ఉంటే.. మహా కుంభమేళాకు భక్తుల తాకిడి భారీగా పెరగడంతో ఉదయం తీర్థరాజ్‌ సంగం తీరంలో తొక్కిసలాట జరిగింది. ఈ తొక్కిసలాటలో పదుల సంఖ్యలో భక్తులు ప్రాణాలు కోల్పోయారు. పలువురికి తీవ్ర గాయాలయ్యాయి. వారు ఆస్పత్రుల్లో చికిత్స పొందుతున్నారు.
ఈ నేపథ్యంలో భక్తులు రద్దీని తగ్గించేందుకు యూపీ సీఎం ఒక ప్రకటన చేశారు. మౌనీ అమావాస్య సందర్భంగా పుణ్య స్నానాలు చేసేందుకు భక్తులు త్రివేణి సంగమానికి తరలి రావాల్సిన అవసరం లేదని, వారివారి సమీప ఘాట్‌లలో స్నానాలు చేసినా సరిపోతుందని చెప్పారు. అయినా భక్తుల తాకిడి తగ్గలేదు. త్రివేణి సంగమానికి భారీగా భక్తులు తరలి వచ్చారు.
మౌని అమావాస్య నేపథ్యంలో పలువురు సాధువులు, యోగులు కూడా భారీ సంఖ్యలో అమృత స్నానాలు చేస్తున్నారు. ఈ సందర్భంగా సాధువులు, యోగులపై యూపీ ప్రభుత్వం హెలికాప్టర్‌లతో ఆకాశం నుంచి పూలు చల్లించింది. ఉత్తరప్రదేశ్‌లోని ప్రయాగ్‌రాజ్‌లో ఈ నెల 13 నుంచి మహా కుంభమేళా ప్రారంభమైంది. ఫిబ్రవరి 26న ఈ మహా కుంభమేళా ముగియనుంది. మొత్తం 16 రోజుల్లో కుంభమేళాకు హాజరైన భక్తుల సంఖ్య 19.94 కోట్లు దాటిందని ఉత్తరప్రదేశ్‌ సమాచార శాఖ తెలిపింది. ఈ మహా కుంభమేళా ముగిసేనాటికి భక్తుల సంఖ్య 50 కోట్లు దాటే అవకాశం ఉందని నిర్వాహకులు అంచనా వేస్తున్నారు.
