అండర్-19 టీ20 ప్రపంచకప్‌లో అదరగొట్టిన తెలంగాణ అమ్మాయి గొంగడి త్రిష(Gongadi Trisha) సీఎం రేవంత్ రెడ్డి(CM Revanth Reddy)ని కలిశారు. హైదరాబాద్‌లోని జూబ్లీహిల్స్ నివాసంలో సీఎం రేవంత్ రెడ్డితో త్రిష మర్యాదపూర్వకంగా భేటీ అయ్యారు. ఈ సందర్భంగా అండర్-19 ప్రపంచ కప్‌లో అద్భుతంగా రాణించిన త్రిషను ముఖ్యమంత్రి అభినందించారు. భవిష్యత్‌లో దేశం తరఫున మరింతగా రాణించాలని ఆకాంక్షించారు. అనంతరం త్రిషకు ప్రభుత్వం తరపున కోటి రూపాయల భారీ నజారానా ప్రకటించారు.
అలాగే మరో టీమ్ మెంబర్ ధ్రుతి కేసరికి రూ.10లక్షలు.. టీమ్ హెడ్ కోచ్ నౌషీన్, ట్రైనర్ షాలినికి చెరో రూ.10లక్షలు ఇస్తున్నట్లు వెల్లడించారు. ఈ కార్యక్రమంలో మంత్రి పొంగులేటి శ్రీనివాస్ రెడ్డి, ప్రభుత్వ ప్రధాన కార్యదర్శి శాంతి కుమారి, ప్రభుత్వ సలహాదారు వేం నరేందర్ రెడ్డి, శాట్స్ చైర్మన్ శివసేనా రెడ్డి, సీఎం సెక్రటరీ షానవాజ్ ఖాసీం, తదితరులు ఉన్నారు.
కాగా ఈ ప్రపంచకప్‌లో త్రిష మొత్తం 309 పరుగులు చేసి సత్తా చాటింది. అంతేకాకుండా బౌలింగ్‌లోనూ రాణించి 7 వికెట్లు తీసింది. ఆమె సొంత ప్రాంతం భద్రాచలం. తొమ్మిదేళ్ల వయసులో హైదరాబాద్ అండర్-16 జట్టులోనూ ఆడింది. అలాగే అండర్-23 కేటగిరీలోనూ ఆడుతోంది.
