కలలు కనడం సాధారణ ప్రక్రియ. ప్రతి వ్యక్తి కలలు కంటుంటారు. వీటిలో కొన్ని భయపెడితే.. మరికొన్ని కలలు సంతోషం కలిగిస్తాయి. అయితే మనం కనే ప్రతి కల భవిష్యత్తు గురించి మంచి లేదా చెడు సంకేతాలను ఇస్తుందని డ్రీమ్ సైన్స్ చెబుతోంది. కలలు మన భవిష్యత్తులో జరిగే సంఘటనలను సూచిస్తాయని నిపుణులు అంటున్నారు. ముఖ్యంగా కలలో కొన్ని వస్తువులు కనిపిస్తే తలరాత మారిపోతుందని.. అదృష్టం దరిద్రం పట్టినట్లు పడుతుందని పండితులు చెబుతున్నారు.
నిద్రపోయే ముందు ఏం ఆలోచిస్తామో.. అదే కలగా కనిపిస్తుంటుందని నిపుణులు చెబుతుంటారు. ఇలలో సాధ్యం కాదు అనుకున్న విషయాలు చాలా కలలో జరుగుతుంటాయి. అసాధ్యం అనుకున్న విషయాన్ని సుసాధ్యం చేసే మరో ప్రపంచం కలల ప్రపంచం. అయితే మనం నిద్రలో కనే కొన్ని కలలు భవిష్యత్తుకు సంకేతమని అంటారు స్వప్నశాస్త్ర నిపుణులు. కలలో ఎలాంటి వస్తువులు కనిపిస్తే అదృష్టం వరిస్తుందో ఈ కథనంలో తెలుసుకుందాం.
కలలో చాలా రకాల వస్తువులు కనిపిస్తుంటాయి. అయితే మీ కలలో తామర పూలు కనిపిస్తే అది మీ తలరాత మారబోతోందనడానికి సంకేతమంట. లక్ష్మీదేవి అనుగ్రహంతో ఆర్థిక లాభాలు పొందుతారు. అప్పుల బాధల నుంచి విముక్తి కలుగుతుందని చెబుతున్నారు నిపుణులు. ఇక కలలో దేవతలు కనిపిస్తే, రాబోయే రోజుల్లో మీరు ఖచ్చితంగా మీ పనిలో విజయం సాధిస్తారని సంకేతమని చెబుతున్నారు. ఆదాయ వనరులు పెరుగుతాయని.. అకస్మాత్తుగా డబ్బు లభిస్తుందని కూడా ఇది సూచిస్తుందంట.
కలల శాస్త్రం ప్రకారం, మీరు మీ కలలో పండ్లు, పండ్లతో నిండిన చెట్టును చూడటం శుభసూచికం అంటున్నారు పండితులు. ఈ కల మీకు రాబోయే భవిష్యత్తులో చాలా డబ్బుని సంపాదిస్తారని.. ధనవంతులు అవుతారని చెబుతుందంట. ఇక కలలో నల్ల తేలు కనిపించినా.. శుభప్రదమే అంటున్నారు నిపుణులు. ఇలాంటి కల వస్తే మీకు ఎక్కడి నుంచైనా సంపద వస్తుందని చెబుతున్నారు. దీనితో పాటు కలలో తేనెపట్టు చూసినట్లయితే అది చాలా శుభ సంకేతంగా భావిస్తారు. అలాంటి కల జీవితంలో సంతోషాన్ని నింపుతుంది. వెంటాడిన ఇబ్బందుల నుంచి ఉపశమనం లభించేలా చేస్తుంది.
హిందువులు ఆవును దేవతగా పూజిస్తారు.. అలాంటి ఆవు దగ్గర దూడ పాలు తాగడం కలలో కనిపిస్తే చాలా మంచిదని అంటున్నారు పండితులు. ఇలాంటి స్వప్నం ఆర్థిక ఇబ్బందులు తొలగిపోతాయని. అకస్మాత్తుగా ఆర్థిక లాభాలు కలుగుతాయని.. ఆస్తి వివాదాలు ఓ కొలిక్కి వస్తాయని చెబుతున్నారు. న్యాయపరమైన విషయాల్లో మీరు విజయం సాధిస్తారని అంటున్నారు. ఇక పిల్లలు కలలో కనిపిస్తే సంపదకు సంకేతంగా భావిస్తారు. ఎప్పటి నుంచో మీ చేతికి రావాల్సిన డబ్బు చేతికి అందుతుందని అర్థం. మీ జీవితంలో పెద్ద ప్రయోజనం పొందుతారని అంటారు.
పాలు తాగినట్లు కల వస్తే అదృష్టం పడుతుందని అంటున్నారు పండితులు. ఈ కల అంటే మీరు కెరీర్ మరియు వ్యాపారంలో ఆశించిన విజయాన్ని పొందబోతున్నారని అర్థం. దీంతో పాటు ఇంట్లో సుఖసంతోషాలు, ఐశ్వర్యం, డబ్బు రాబోతున్నాయని సూచిస్తుందంట. ఇక చీమలు సంపదను కూడబెట్టడంలో మేటి. అందుకే కలలో చీమలు కనిపిస్తే శుభ సంకేతంగా చెబుతారు. డ్రీమ్ సైన్స్ ప్రకారం, తెల్ల చీమలు కనిపిస్తే ఇంకా మంచిది. త్వరలోనే ఆర్థికంగా ఎదుగుతారని అర్థమంట. కలలో గుర్రంపై స్వారీ చేస్తున్నట్లు కనిపిస్తే.. మీరు ప్రస్తుతం పనిచేస్తున్న రంగంలో మెరుగైన ఫలితాలు అందుతాయని అర్థమంట.
