నటసింహం బాలకృష్ణ(Balakrishna) నటించిన ‘డాకు మహారాజ్’(Daaku Maharaaj)సినిమా బాక్సాఫీస్ వద్ద సూపర్ హిట్ అయిన సంగతి తెలిసిందే. సినిమాలో బాలయ్య డైలాగ్స్, యాక్షన్ సీక్వెన్స్, థమన్ బీజీఎం గూస్ బంప్స్ తెప్పించాయి. సరికొత్త అవ‌తారంలో బాలయ్య క‌నిపించ‌డంతో ప్రేక్షకులు ఈ చిత్రానికి బ్ర‌హ్మ‌ర‌థం ప‌ట్టారు. రూ.170కోట్లకు పైగా వసూళ్లు రాబట్టి బాలయ్య కెరీర్‌లో అత్యధిక కలెక్షన్స్ వసూలు చేసిన చిత్రంగా నిలిచింది. ఈ చిత్రంతో వరుసగా నాలుగు రూ.100కోట్ల మూవీలు రాబట్టిన సీనియర్‌ హీరోగా బాలయ్య రికార్డు సృష్టించారు. అంతకుముందు అఖండ, వీరసింహా రెడ్డి, భగవంత్ కేసరి సినిమాలు రూ.100 కోట్లకు పైగా వసూళ్లు చేశాయి.
థియేటర్స్‌లో ప్రేక్షకులను మెప్పించిన ఈ మూవీ ఓటీటీ స్ట్రీమింగ్ కోసం ప్రేక్షకులు ఎదురుచూస్తున్నారు. నేటి నుంచి ఈ మూవీ ప్రముఖ ఓటీటీ ప్లాట్ ఫామ్ నెట్‌ఫ్లిక్స్(Netflix) వేదికగా తెలుగుతో పాటు తమిళ, మలయాళం, కన్నడ, హిందీ భాషల్లో స్ట్రీమింగ్ అవుతోంది. ఇక బాలయ్య సినిమాల విషయానికొస్తే ప్రస్తుతం ‘అఖండ 2’ సినిమాతో బిజీగా ఉన్నారు. ఆ తర్వాత గోపిచంద్ మలినేని దర్శకత్వంలో నటించేందుకు రెడీ అయ్యారు.
