అక్కినేని హీరో నాగ చైతన్య(Naga Chaitanya) హీరోగా నటించిన ‘తండేల్’(Thandel) మూవీ బాక్సాఫీస్ వద్ద దుమ్మురేపిన సంగతి తెలిసిందే. సినిమాలో చైతూ, సాయి పల్లవి జోడీకి మంచి రెస్పాన్స్ రావడంతో ప్రేక్షకులు థియేటర్లకు క్యూ కట్టారు. ప్రపంచవ్యాప్తంగా ఫస్ట్ డే రూ.21.24కోట్ల గ్రాస్ కలెక్షన్స్ రాబట్టిన ఈ చిత్రం చైతన్య కెరీర్‌లోనే తొలి రోజు అత్యధిక కలెక్షన్లు వచ్చిన సినిమాగా నిలిచింది. రెండో రోజు కూడా రూ.20కోట్ల గ్రాస్ కలెక్షన్స్ వసూలు చేసి అదరగొట్టింది. ఇక వారం రోజుల్లోనే రూ.100 కోట్లకు పైగా వసూళ్లు వచ్చాయి. అటు ఓవర్సీస్‌లోనూ ‘తండేల్’ తాండవం చేసింది. మొత్తంగా నాగచైతన్య కెరీర్‌లోనే భారీ కలెక్షన్లు రాబట్టిన చిత్రంగా నిలిచింది.
ఓవైపు థియేటర్లలో రన్ అవుతుండగానే.. ఓటీటీ స్ట్రీమింగ్‌కు రెడీ అయింది. మార్చి 7నుంచి ప్రముఖ ఓటీటీ ఫ్లాట్‌ఫామ్ నెట్‌ఫ్లిక్స్ వేదికగా స్ట్రీమింగ్‌ కానుంది. తెలుగుతోపాటు తమిళం, మలయాళం, కన్నడ, హిందీ భాషల్లో ప్రేక్షకులకు అందుబాటులోకి రానుంది. ఈమేరకు నెట్‌ఫ్లిక్స్ అధికారికంగా ప్రకటించింది. కాగా ఈ సినిమాను ప్రముఖ నిర్మాణ సంస్థ గీతా ఆర్ట్స్ భారీ బడ్జెట్‌తో నిర్మించగా.. చందూ మొండేటి దర్శకత్వం వహించారు. శ్రీకాకుళం మత్స్యకారుల జీవితం నేపథ్యంలో సినిమాను తెరకెక్కించారు. రాక్ స్టార్ దేవిశ్రీ ప్రసాద్ సంగీతం అందించారు.
