పాకిస్తాన్ లోని బలూచిస్తాన్ లిబరేషన్ ఆర్మీ (BLA) తీవ్రవాదులు బరితెగించారు. తాజాగా జాఫర్ ఎక్స్‌ప్రెస్ రైలును హైజాక్ చేశారు. ఈ ఘటనతో అందరూ ఒక్కసారిగా ఉలిక్కి పడ్డారు. క్వెట్టా నుంచి పెషావర్‌కు వెళ్తున్న ఈ రైలులో సుమారు 450 మంది ప్రయాణికులు ఉన్నట్లు పాక్ మీడియా చెబుతోంది. అంతేకాదు వీరిలో సుమారు 140 మంది పాక్ సైనికులు కూడా ఉన్నట్లు తెలుస్తోంది. అయితే తీవ్రవాదులు రైలుపై దాడి చేసి, సైనికులను బందీలుగా తీసుకున్నారు. మిగిలిన సాధారణ ప్రయాణికులను విడిచి పెట్టినట్లు తెలుస్తోంది.
BLA సభ్యులు రైలు దారణా దగ్గర బాంబు పేలుళ్లు జరిపి లోకో పైలట్లకు ఇబ్బంది ఎదురైంది. ఆ తర్వాత రైలును తమ ఆధీనంలోకి తీసుకున్నారు. ఈ దాడిలో ఆరుగురు పాకిస్తాన్ సైనికులను కాల్చి చంపినట్లు Xలోని పోస్టుల ద్వారా తెలుస్తోంది. మిగిలిన సైనికులను బందీలుగా ఉంచి వారిని తమతో తీసుకెళ్లారు. ఈ ఘటనతో పాకిస్తాన్‌లో కలకలం రేగింది, భద్రతా బలగాలు వెంటనే రంగంలోకి దిగాయి.
బలూచిస్తాన్ ప్రాంతంలో చాలా కాలంగా వేర్పాటువాద ఉద్యమాలు సాగుతున్నాయి.
BLA తమ పోరాటంలో భాగంగా పాకిస్తాన్ ప్రభుత్వం, సైన్యంపై దాడులు చేస్తోంది. ఈ రైలు హైజాక్ ఘటనను వారు తమ బలాన్ని చాటుకునేందుకు చేసినట్లు భావిస్తున్నారు. పాక్ అధికారులు ఈ దాడిని తీవ్రంగా ఖండించారు. బందీలను విడిపించేందుకు చర్యలు చేపట్టినట్లు తెలిపారు. ఈ ఘటనపై పూర్తి వివరాలు ఇంకా స్పష్టత రావాల్సి ఉంది. కానీ ప్రస్తుతం లభ్యమైన సమాచారం ప్రకారం ఇది బలూచిస్తాన్‌లో ఉద్రిక్తతలను మరింత పెంచే అవకాశం ఉంది.
స్థానిక మీడియా, X పోస్టుల ద్వారా వస్తున్న నివేదికలు ఈ దాడి తీవ్రతను సూచిస్తున్నాయి. పాకిస్తాన్ ప్రభుత్వం ఈ సంఘటనను ఎలా నిర్వహిస్తుందనేది రాబోయే రోజుల్లో తేలనుంది. బలూచిస్థాన్‌ను ప్రత్యేక దేశంగా ప్రకటించాలని వేర్పాటువాదులు కోరుతున్నారు. ఇది ఏళ్లుగా ఉన్న అంశం. ఇందులో ఒక ప్రత్యేకత ఏంటంటే ఇండియా కూడా బలూచిస్తాన్ వేర్పాటువాదులకు ఇదివరకు మద్దతుగా మాట్లాడింది. ప్రస్తుతం ఈ విషయంలో భారత్ దూరంగా ఉంటోంది.
