ప్రపంచ ప్రసిద్ధి చెందిన మెక్‌డొనాల్డ్స్ సంస్థ తెలంగాణ ప్రభుత్వంతో ఒక ముఖ్యమైన ఒప్పందం కుదుర్చుకుంది. ఈ ఒప్పందం ప్రకారం, మెక్‌డొనాల్డ్స్ తన కార్యకలాపాలను విస్తరించేందుకు హైదరాబాద్‌లో తన గ్లోబల్ ఇండియా ఆఫీసును ఏర్పాటు చేయనుంది. ఈ కొత్త ఆఫీసులో 2,000 మందికి పైగా ఉద్యోగులు పనిచేయనున్నారు. బుధవారం ముఖ్యమంత్రి రేవంత్ రెడ్డి అసెంబ్లీలోని తన చాంబర్‌లో మెక్‌డొనాల్డ్స్ ఛైర్మన్, సీఈవో క్రిస్ కెంప్‌జిన్స్కీతో సమావేశమై ఈ ఒప్పందంపై చర్చలు జరిపారు.
హైదరాబాద్‌లో తమ గ్లోబల్ ఆఫీసును ఏర్పాటు చేయడం పట్ల మెక్‌డొనాల్డ్స్ సంస్థ తీసుకున్న నిర్ణయంపై ముఖ్యమంత్రి హర్షం వ్యక్తం చేశారు. దేశంలోని అనేక రాష్ట్రాలు ఈ ఆఫీసును తమ రాష్ట్రంలో ఏర్పాటు చేయాలని పోటీ పడుతున్న సమయంలో.. మెక్‌డొనాల్డ్స్ తెలంగాణను ఎంచుకోవడం గొప్ప విషయమని ఆయన అన్నారు. ఈ ప్రాజెక్టుకు తన ప్రభుత్వం అన్ని విధాలా సహాయం అందిస్తుందని హామీ ఇచ్చారు. గత 15 నెలలుగా రాష్ట్రంలో నైపుణ్యాభివృద్ధి కోసం తన ప్రభుత్వం చేపడుతున్న కార్యక్రమాలను కూడా ఆయన ఈ సందర్భంగా వివరించారు.
తెలంగాణలో నైపుణ్యం కలిగిన యువతను నియమించుకోవడానికి మెక్‌డొనాల్డ్స్ యంగ్ ఇండియా స్కిల్స్ యూనివర్సిటీ సేవలను ఉపయోగించుకోవచ్చని ముఖ్యమంత్రి సూచించారు. ఈ యూనివర్సిటీని ఒక నైపుణ్య శిక్షణా కేంద్రంగా ఉపయోగించుకుని, ఇక్కడ శిక్షణ పొందిన యువతకు గ్లోబల్ ఆఫీసులోనే కాకుండా, దేశ విదేశాల్లో ఉన్న మెక్‌డొనాల్డ్స్ రెస్టారెంట్లలో కూడా ఉద్యోగాలు కల్పించాలని కోరారు.
మెక్‌డొనాల్డ్స్‌కు అవసరమైన వ్యవసాయ ఉత్పత్తులను స్థానిక రైతుల నుండి సేకరించేలా చూడాలని ముఖ్యమంత్రి కోరారు. దీనివల్ల రైతుల ఆదాయం పెరగడమే కాకుండా రాష్ట్ర ఆర్థిక వ్యవస్థకు కూడా తోడ్పాటు లభిస్తుందని ఆయన అభిప్రాయపడ్డారు.
హైదరాబాద్‌ను తమ గ్లోబల్ ఇండియా ఆఫీసుగా ఎంచుకోవడానికి గల కారణాలను మెక్‌డొనాల్డ్స్ సీఈవో క్రిస్ కెంప్‌జిన్స్కీ వివరించారు. బెంగళూరు వంటి నగరాలతో పోలిస్తే, హైదరాబాద్‌లో నైపుణ్యం కలిగిన నిపుణులు అధికంగా అందుబాటులో ఉన్నారని, మౌలిక సదుపాయాలు మెరుగ్గా ఉన్నాయని, జీవన ప్రమాణాలు కూడా ఉత్తమంగా ఉన్నాయని ఆయన అన్నారు. ప్రపంచవ్యాప్తంగా మెక్‌డొనాల్డ్స్ నిర్వహిస్తున్న సామాజిక సేవా కార్యక్రమాలను కూడా ఆయన ఈ సందర్భంగా వివరించారు. తెలంగాణ ప్రభుత్వ సహకారంతో రాష్ట్రంలో కూడా ఇటువంటి కార్యక్రమాలను చేపడతామని తెలిపారు.
ప్రస్తుతం తెలంగాణలో 38 మెక్‌డొనాల్డ్స్ రెస్టారెంట్లు ఉన్నాయి. ప్రతి సంవత్సరం మూడు లేదా నాలుగు కొత్త రెస్టారెంట్లను ప్రారంభించాలని సంస్థ లక్ష్యంగా పెట్టుకుంది. హైదరాబాద్‌లో కొత్తగా గ్లోబల్ ఇండియా ఆఫీసు ఏర్పాటుతో రాష్ట్రంలోని యువతకు మరిన్ని ఉద్యోగావకాశాలు లభించనున్నాయి.
