గ్రేటర్ విశాఖ మున్సిపల్ కార్పొరేషన్ (GVMC) రాజకీయంగా వేడెక్కిపోయింది. మేయర్ గొలగాని హరివెంకట కుమారిపై అవిశ్వాస తీర్మానం చర్చించేందుకు ఇవాళ ఉదయం 11 గంటలకు కౌన్సిల్ సమావేశం నిర్వహించేందుకు సిద్ధతలు పూర్తయ్యాయి. ఈ సమావేశానికి ఇన్‌చార్జ్ కమిషనర్‌, కలెక్టర్ ఎంఎన్ హరేంద్ర ప్రసాద్ అధ్యక్షత వహించనున్నారు. వైసీపీ కార్పొరేటర్ల రాజీనామాలు, పార్టీ మార్పులు, బలాబలాల సమీకరణలతో గ్రేటర్‌లో రాజకీయం రసవత్తరంగా మారింది.
ఒకానొక దశలో అఖండ ఆధిపత్యంలో ఉన్న వైసీపీ ప్రస్తుతం 59 మంది నుంచి కేవలం 31 మంది కార్పొరేటర్లకే పరిమితమైంది. మరోవైపు తెలుగుదేశం, జనసేన, బీజేపీ మైత్రి కూటమి బలంగా ఎదుగుతోంది. టీడీపీ కార్పొరేటర్లు 48కు చేరగా, జనసేన 14 మందితో నిలిచి ఉంది. బీజేపీకి ఇద్దరు కార్పొరేటర్లు ఉన్నారు. మొత్తం 111 ఓట్లున్న కౌన్సిల్‌లో మేయర్ పీఠాన్ని దక్కించుకోవాలంటే మేజిక్ ఫిగర్ 74 అవసరం. ప్రస్తుతం ఈ ఫిగర్ దిశగా కూటమి విజయాన్ని సాధించేందుకు రంగం సిద్ధం చేస్తోంది.
ఇక ప్రత్యేక సమావేశానికి ముందు, రెండు వర్గాలు తమ తమ మద్దతుదారులను క్యాంపుల్లో ఉంచుతూ అప్రమత్తంగా వ్యవహరించాయి. కూటమి కార్పొరేటర్లు మలేసియాకు వెళ్లి శుక్రవారం రాత్రి తిరిగి విశాఖకు చేరుకోగా, వైసీపీ కార్పొరేటర్లు బెంగళూరు, అక్కడి నుంచి శ్రీలంకకి తరలించారు. వారం చివర్లోనే నగరానికి మళ్లీ చేరే అవకాశం ఉందని సమాచారం. వైసీపీ ఇప్పటికే తమ సభ్యులకు విప్ జారీ చేసింది. అయితే ఓటింగ్‌కు దూరంగా ఉండనున్నట్లు స్పష్టం చేసింది. దీంతో, సమావేశానికి హాజరయ్యే సభ్యుల ఓట్ల ఆధారంగా తుదినిర్ణయం వెలువడే అవకాశం ఉంది. ఏదేమైనా, ఈరోజుతో మేయర్ పీఠం చుట్టూ నెలకొన్న ఉత్కంఠకు ముగింపు పడే అవకాశం కనిపిస్తోంది.
అంతేగాక, కౌన్సిల్ ఓటింగ్ సమయంలో పారదర్శకతను కాపాడేందుకు వీడియో రికార్డింగ్ చేయాలని కలెక్టర్ హరేంద్రప్రసాద్ ఆదేశించారు. భద్రతా దృష్ట్యా జివీఎంసీ కార్యాలయ పరిసరాల్లో పోలీసు బందోబస్తు కూడా ఏర్పాటు చేశారు. ఈ రాజకీయ మార్పుల నేపథ్యంలో విశాఖ ప్రజలు మేయర్ పీఠం ఎవరికి దక్కుతుందన్న ఆసక్తికరమైన ప్రశ్నకు ఇవాళ సమాధానం దొరికే అవకాశముంది.
