వేసవి సెలవులు ప్రారంభం కాకముందే తిరుమలలో భక్తుల రద్దీ ఊహించని స్థాయిలో పెరిగిపోయింది. స్వామివారి దర్శనం కోసం దేశం నలుమూలల నుంచి వచ్చిన భక్తులు క్యూ కాంప్లెక్స్‌లలో గంటల తరబడి వేచిచూస్తున్నారు. ముఖ్యంగా టోకెన్లులేని సర్వదర్శనం కోసం భక్తులు 24 గంటలపాటు వేచివుండాల్సిన పరిస్థితి ఏర్పడింది. టీబీసీ క్యూలైన్ వరకు భక్తుల సందడి కనిపిస్తోంది. కంపార్ట్‌మెంట్లు అన్నీ నిండిపోవడంతో దేవస్థానం అధికారులు భద్రతా ఏర్పాట్లను కట్టుదిట్టంగా నిర్వహిస్తున్నారు.
నిన్నటి ఒక్క రోజే స్వామివారి దర్శనానికి 58 వేల మంది భక్తులు వచ్చారు. భారీగా తల నీలాలు సమర్పించిన భక్తుల సంఖ్య 30 వేలకి పైగా ఉండగా, హుండీ ద్వారా ₹3.27 కోట్ల ఆదాయం వచ్చిందని తిరుమల తిరుపతి దేవస్థానం (TTD) వెల్లడించింది. ఇక జూలై నెల దర్శనానికి సంబంధించిన ప్రత్యేక టికెట్లకు సంబంధించి టీటీడీ ఇప్పటి నుంచే కార్యాచరణ ప్రారంభించింది. ఈ రోజు ఉదయం 10 గంటల నుంచి లక్కీ డీప్ విధానంలో టికెట్లకు ఆన్‌లైన్ నమోదు ప్రారంభమైంది. రెండు రోజులపాటు ఈ లక్కీ డీప్ కొనసాగుతుందని, లక్కీ డీప్‌లో ఎంపికైన వారు ఏప్రిల్ 22న టికెట్ ధనాన్ని చెల్లించి తమ ప్రత్యేక దర్శనాన్ని నిర్ధారించుకోవచ్చని టీటీడీ తెలిపింది.
అదే రోజున బ్రహ్మోత్సవాలు, సహస్ర దీపాలంకరణ సేవకు సంబంధించిన టికెట్లతో పాటు వర్చువల్ సేవ టికెట్లు కూడా ఆన్‌లైన్‌లో విడుదల కానున్నాయి. జూలై నెల కోటకు చెందిన శ్రీవాణి ట్రస్ట్ బ్రేక్ దర్శనం టికెట్లు ఏప్రిల్ 23 ఉదయం 11 గంటలకు విడుదల కానున్నాయి. అదే రోజు వృద్ధులు, దివ్యాంగుల కోసం మధ్యాహ్నం 3 గంటలకు టోకెన్లు అందుబాటులోకి వస్తాయి. తదుపరి రోజు ఏప్రిల్ 24న రూ.300 ప్రత్యేక దర్శనం టికెట్లతో పాటు గదుల బుకింగ్‌ కూడా ప్రారంభమవుతుంది. అన్ని సేవలకు సంబంధించిన టికెట్లు టిటిడి అధికారిక వెబ్‌సైట్ లేదా యాప్ ద్వారా పొందవచ్చని అధికారులు సూచిస్తున్నారు. ఇప్పటికే తిరుమలలో భక్తుల రద్దీ పెరిగిన నేపథ్యంలో, ప్రత్యేక దర్శన టికెట్లకు పోటీ తీవ్రంగా ఉండే అవకాశం ఉన్నందున భక్తులు ముందస్తుగా ప్రణాళిక వేసుకుని టికెట్లు బుక్ చేసుకోవాలని టీటీడీ విజ్ఞప్తి చేసింది.
