శరీరాన్ని ఆరోగ్యంగా ఉంచుకోవాలంటే ప్రకృతితో కలిసిన ఆహారపు అలవాట్లు అవసరం. వాటిలో బొప్పాయి జ్యూస్ ఒకటి. ఇది ఆరోగ్యానికి ఎన్నో ప్రయోజనాలను అందిస్తుంది. విటమిన్లు, మినరల్స్, యాంటీఆక్సిడెంట్లు అధికంగా ఉండే బొప్పాయి జ్యూస్ రోజువారీ ఆహారంలో భాగంగా తీసుకుంటే అనేక రోగాలను నివారించవచ్చు అంటున్నారు నిపుణులు. ముఖ్యంగా పొట్ట సమస్యలతో బాధపడేవారికి ఇది గొప్ప సహాయకారని చెబుతున్నారు.
బొప్పాయిలో ఉండే పాపైన్ అనే ఎంజైమ్ జీర్ణక్రియను మెరుగుపరిచి మలబద్ధకం, ఉబ్బరం, గ్యాస్‌ సమస్యలను తగ్గిస్తుంది. అలాగే బొప్పాయి జ్యూస్‌లో ఉండే విటమిన్ C, శరీర రోగనిరోధక శక్తిని పెంచుతుంది. ఇది సాధారణ జలుబు, ఫ్లూ వంటి వైరస్‌లను దూరంగా ఉంచడంలో సహాయపడుతుంది. చర్మానికి కూడా ఇది ఎంతో మేలు చేస్తుంది. విటమిన్ A మరియు యాంటీఆక్సిడెంట్లు చర్మాన్ని నిగారింపుగా ఉంచి, తేమను నిలుపుతాయి. బరువు తగ్గాలనుకునే వారికి ఇది ఉత్తమ ఎంపిక. తక్కువ కేలరీలు, అధిక ఫైబర్ వల్ల ఆకలి తగ్గి తక్కువగా తినడం జరుగుతుంది. జీవక్రియ కూడా బాగుంటుంది.
బొప్పాయిలో ఉండే బీటా-కెరోటిన్ కంటి ఆరోగ్యానికి ఎంతో అవసరం. వయస్సు పెరిగేకొద్దీ వచ్చే చూపు సమస్యలు, మచ్చల క్షీణత వంటి రుగ్మతలను తగ్గించడంలో సహాయపడుతుంది. అలాగే లైకోపీన్ వంటి శక్తివంతమైన యాంటీఆక్సిడెంట్లు క్యాన్సర్ కణాల అభివృద్ధిని తగ్గిస్తాయి. ముఖ్యంగా ప్రోస్టేట్, రొమ్ము క్యాన్సర్లను నిరోధించడంలో ఇది సహాయపడుతుంది. గుండె ఆరోగ్యాన్ని మెరుగుపరిచే పోటాషియం, ఫైబర్ కూడా బొప్పాయి జ్యూస్‌లో ఎక్కువగా ఉంటాయి. ఇవి రక్తపోటును నియంత్రించి, చెడు కొలెస్ట్రాల్‌ను తగ్గించడంలో తోడ్పడతాయి. ఫలితంగా గుండె జబ్బుల ప్రమాదం తగ్గుతుంది.
ఇంత ఉపయోగకరమైన బొప్పాయి జ్యూస్‌ను ఇంట్లోనే తేలికగా తయారుచేయవచ్చు. బాగా పండిన బొప్పాయిని ముక్కలుగా కోసి మిక్సీలో వేసి కొద్దిగా నీరు లేదా పాలు కలిపి బ్లెండ్ చేయాలి. రుచి కోసం తేనె లేదా నిమ్మరసం కలుపొచ్చు. అయితే బొప్పాయి జ్యూస్‌ను మితంగా తీసుకోవడం మేలుకోసం. ఎక్కువగా తీసుకుంటే కొన్ని మందులకు దుష్ప్రభావాలు కలగవచ్చు. అందుకే ప్రతి రోజు ఒక గ్లాస్ చొప్పున బొప్పాయి జ్యూస్ తీసుకుంటే ఆరోగ్యానికి ఎంతో మేలు చేస్తుంది. (గమనిక: ఈ కథనం ఇంటర్నెట్ లో అందుబాటులో ఉన్న సమాచారం ఆధారంగా రాసినది. దీనిని తెలుగు ప్రభ ధృవీకరించడం లేదు.)
