ఇల్లు అనేది కేవలం ఒక గృహ నిర్మాణం కాదు. అది మన హృదయానికి దగ్గరైన స్థలం. అక్కడ మన జ్ఞాపకాలు, భావోద్వేగాలు ఉంటాయి. మన శరీరానికి హృదయం ఎంత ముఖ్యమో, మన జీవితానికి ఇల్లు అంతే ప్రాధాన్యత కలిగినది. వాస్తు శాస్త్రం ప్రకారం ఇంట్లో ప్రతి దిశకి ఒక ప్రత్యేక శక్తి ఉంటుంది. ఆ శక్తిని సమతుల్యంగా ఉంచడానికి కొన్ని చిన్నచిన్న ఆచారాలు చాలా కీలకమైనవిగా భావిస్తారు. వాటిలో ముఖ్యమైనదిగా దీపం వెలిగించడం.
ప్రతిరోజూ ఇంట్లో దీపం వెలిగించడం ఒక పవిత్ర ఆచారం మాత్రమే కాక, శాస్త్రీయంగా కూడా శ్రేయస్సును ఆహ్వానించే ప్రక్రియగా చూస్తారు. ఉదాహరణకు తూర్పు దిశలో వెలిగించే దీపం ఆరోగ్యాన్ని బలోపేతం చేస్తుంది. దీర్ఘాయువు కోసం ఇది మంచిదని భావిస్తారు. పశ్చిమ దిశలో దీపం వెలిగిస్తే కుటుంబంలో ప్రేమ, సమతుల్యత, సాన్నిహిత్యం పెరుగుతాయి. ఉత్తర దిశలో వెలిగించిన దీపం ఆర్థిక స్థితిని మెరుగుపరచడంలో దోహదపడుతుంది. సంపద దిశగా భావించే ఈ ప్రాంతంలో కుబేరుని ఆశీస్సులు సిద్ధిస్తాయని నమ్మకం.
దక్షిణ దిశ పూర్వీకులను సూచిస్తుంది. ఇక్కడ దీపం వెలిగిస్తే వారి ఆశీస్సులు లభిస్తాయని, కుటుంబంలో శాంతి నెలకొంటుందని పెద్దలు చెబుతారు. ఈశాన్య మూల, అత్యంత పవిత్రమైన దిక్కుగా భావించబడుతుంది. ఈ దిశలో వెలిగించిన దీపం ఆధ్యాత్మిక శక్తిని పెంచి, ఇంటిలో దైవిక అనుభూతిని కలిగిస్తుంది. దీనివల్ల శ్రద్ధ, భక్తి వంటి భావోద్వేగాలు మెరుగు పడతాయి. అలాగే ఆగ్నేయ దిశలో దీపం వెలిగించడం ద్వారా మనస్సులోని ఆందోళనలు తొలగిపోతాయి. మానసిక శాంతి, ఆత్మనిర్మలత సాధ్యమవుతుంది.
దీపాలను వెలిగించడానికి అత్యంత అనుకూలమైన సమయం సూర్యాస్తమయానంతరం. ఈ సమయాన్ని ‘ప్రదోషకాలం’ అని పిలుస్తారు. ఇది శుద్ధి చేసే సమయంగా పరిగణించబడుతుంది. ఇంట్లో ప్రతిరోజూ ఈ సమయంలో దీపాలు వెలిగించడం వల్ల ప్రతికూల శక్తులు తొలగిపోతాయి. ఇంటి వాతావరణం శుభ్రంగా, శాంతియుతంగా మారుతుంది. ప్రతి మూలలో దీపాలను వెలిగిస్తూ జీవితం లోకి కొత్త వెలుగు తీసుకురావచ్చు. ఈ పరంపరాగత ఆచారంలో ఎంత శాస్త్రీయత ఉందో అంతే ఆధ్యాత్మికత కూడా ఉంది. ఇంటి ప్రతి మూలలో వెలిగే దీపం మన జీవితంలో ఒక దిశను నిర్దేశిస్తుంది. (గమనిక: ఈ కథనం ఇంటర్నెట్ లో అందుబాటులో ఉన్న సమాచారం ఆధారంగా రాసినది. దీనిని తెలుగు ప్రభ ధృవీకరించడం లేదు.)
