బాదం నూనెతో చర్మం, శిరోజాలు ఎంతో అందంగా , అరోగ్యంగా ఉంటాయి. గోళ్లు సైతం పటిష్టంగా ఉంటాయి. ఇందులో యాంటాక్సిడెంట్లు, విటమిన్లు, ఫ్యాట్స్ ఉండడం వల్ల చర్మం ఎంతో కాంతివంతంగా కనిపిస్తుంది. బాదం నూనెతో పలు ఆరోగ్య సమస్యలే కాదు పలు బ్యూటీ సమస్యలకు సైతం పరిష్కారాలు ఉన్నాయి. అవేమిటంటే:
బాదంలో ఎసెన్షియల్ విటమిన్లు ఎక్కువగా ఉండడంతో చర్మానికి కావలసినంత మాయిశ్చరైజర్ అందుతుంది. ముఖానికి బాదం నూనె రాసుకుని కాసేపు అలాగే ఉంచుకుని కడిగేసుకోవాలి. ఇలా చేస్తే చర్మంపై అది స్రుష్టించే వండర్స్ ఎన్నో.
వేసవి కాలంలో వేడి తీవ్రత ఎక్కువగా ఉంటుంది. అలాగే సూర్యతాపం కూడా బాగా ఉంటుంది. వీటి వల్ల శరీరంపై ట్యాన్ సమస్య తలెత్తుతుంది. బాదం నూనె, తేనె, నిమ్మరసం మూడింటినీ కలిపి పేస్టులా చేసుకుని చర్మంపై రాసుకుంటే ట్యాన్ సమస్య నుంచి బయటపడతాం. ఆరోగ్యవంతమైన, మెరిసే చర్మానికి కూడా ఈ పేస్టు ఎంతో బాగా పనిచేస్తుంది.
చర్మం ఇరిటేషన్ తో , ఇన్ఫ్లమేషన్ తో బాధపడుతున్నారా? వాటి నుంచి బాదం నూనె ఎంతో సాంత్వననిస్తుంది. బాదం నూనె చర్మానికి రాసుకుంటే చర్మం పగలదు. చర్మంపై తరచూ దురద వస్తుంటే రాత్రి పడుకోబోయే ముందు దురదగా ఉన్న చోట బాదం నూనె రాసుకుని పడుకుంటే చాలు. ఉదయానికి సమస్య మాయం అవుతుంది.
మేకప్ ను తొలగించడంలో బాదం నూనె ఎంతో శక్తివంతంగా పనిచేస్తుంది. అంతేకాదు యాక్నే సమస్యను కూడా తగ్గిస్తుంది. అలాగే చర్మంపై ఏర్పడ్డ మచ్చలను పోగొడుతుంది.
రసాయనాలతో నిండి ఉన్న క్రీములను చర్మానికి రాసుకుంటే చర్మంపై నల్లటి వలయాలు ఏర్పడే అవకాశం ఉంది. చర్మంపై ఏర్పడ్డ ఇలాంటి నల్లటి వలయాలతో పాటు, కళ్ల కింద ఏర్పడ్డ సంచులను కూడా బాదం నూనె తగ్గిస్తుంది. మీరు చేయాల్సిందల్లా నిద్రపోవడానికి ముందు బాదం నూనెను ముఖానికి రాసుకోవడమే. ఇలా రెండు వారాలు చేస్తే స్కిన్ పై మంచి ఫలితం కనపడుతుంది.
పగిలిన పెదాలపై బాదం నూనె రాస్తే చర్మం ఎంతో మ్రుదువుగా తయారవుతుంది. తేనె, బాదం నూనె మిశ్రమాన్ని పెదాలపై రాసుకున్నా పగుళ్లు పోయి పెదాలపై ఉండే చర్మం నునుపుగా తయారవుతుంది.
బాదం నూనెను యాంటి ఏజింగ్ ఆయిల్ గా బ్యూటీ నిపుణులు పేర్కొంటారు. నిత్యం మీ ముఖానికి బాదం ఆయిల్ రాసుకుంటే పెరిగిన వయసు తెలియకుండా ఎంతో యంగ్ గా కనిపిస్తారు. అంతేకాదు చర్మం ఎంతో కాంతివంతంగా తయారవుతుంది. రెండు స్పూన్ల బాదం నూనెలో విటమిన్ ఇ రెండు చుక్కలు కలిపి ఆ మిశ్రమాన్ని కాస్త గోరవెచ్చగా చేసి దానితో చర్మాన్ని మసాజ్ చేసుకోవాలి.
బాదంనూనె, ఆముదం నూనె, ఆలివ్ నూనెలను సమపాళ్లల్లో తీసుకుని మూడింటినీ బాగా కలిపి ఆ మిశ్రమంతో వెంట్రుకలను మసాజ్ చేసుకోవాలి. ఇలా చేయడం వల్ల జుట్టు అంచులు చిట్లవు. వారానికి ఒకటి లేదా రెండుసార్ల చొప్పున కొన్ని వారాలపాటు ఇలా చేస్తే మంచి ఫలితం కనిపిస్తుంది.
తలలో చుండ్రును బాదం నూనె నివారిస్తుంది. బాదం నూనె, ఆలివ్ నూనెలు కలిపి ఆ మిశ్రమాన్ని మాడుపై రాసుకొని 20 నిమిషాలు అలాగే ఉంచాలి. ఆ తర్వాత తేలికపాటి షాంపుతో తలస్నానం చేయాలి. ఇలా చేయడం వల్ల తలలోని చుండ్రు పోతుంది.
శుభ్రంగా ఉన్న మస్కారా దండాన్ని తీసుకుని దాన్ని బాదం నూనెలో ముంచాలి. కంటి రెప్పలకు మస్కారా ఎలా అప్లై చేస్తారో అలాగే ఈ నూనెను కూడా కంటిరెప్పలపై అప్లై చేయాలి. ఇలా రోజూ చేస్తే కనురెప్పలు పెద్దవిగా అయి చూడడానికి ఎంతో ఆకర్షణీయంగా కనపడతారు.
బాదం నూనె జిడ్డుగా ఉండదు. ఎంతో తేలికగా కూడా ఉంటుంది. దీన్ని పాదాలకు, చేతులకు రాసుకుంటే చాలు చర్మం మ్రుదువుగా అవుతుంది. ఇక ఎలాంటి ఇతర క్రీములూ వాడనవసరం లేదు. బాదం నూనెలో జింకు ఉండడం వల్ల కాళ్ల పగుళ్లతో పాటు పాదాలు, చేతులపై ఉండే చర్మం డ్రైగా ఉండడం తగ్గుతుంది.
బాదం నూనె స్ట్రెచ్ మార్కులను పోగొడుతుంది. స్నానం చేసిన తర్వాత స్ట్రెచ్ మార్కులు ఉన్న చోట బాదం నూనె రాసి ఐదు నిమిషాలు వేలి కొసలతో గుండ్రంగా మసాజ్ చేయాలి. ఇలా రోజులో రెండుసార్లు చేయాలి.