AHMEDABAD PLANE CRASH : ఆర్థిక సహాయం కోరుతూ IMA లేఖ

IMA Urges Tata Sons For Financial Support To Students : అహ్మదాబాద్ విమాన ప్రమాదంలో బీజే మెడికల్ కాలేజీ విద్యార్థుల మృతి, గాయాల ఘటన దేశవ్యాప్తంగా తీవ్ర దిగ్భ్రాంతిని కలిగించింది. ఈ దుర్ఘటనపై ఇండియన్ మెడికల్ అసోసియేషన్ (IMA) తీవ్ర ఆవేదన వ్యక్తం చేసింది. నిండు ఆశయాలతో వైద్య వృత్తిలోకి అడుగుపెడుతున్న అమాయక విద్యార్థులు ఇలా ప్రాణాలు కోల్పోవడం వైద్య లోకాన్ని కలచివేసింది. ఏ తప్పు లేకుండానే వారి ఉజ్వల భవిష్యత్తు అంధకారంలో పడటం విషాదకరమని IMA పేర్కొంది. మానవతా దృక్పథంతో, మరణించిన విద్యార్థుల కుటుంబాలకు, గాయపడిన వారికి ఆర్థిక సహాయం అందించాలని కోరుతూ టాటా సన్స్ చైర్మన్ ఎన్. చంద్రశేఖరన్‌కు IMA లేఖ రాసింది.

ఐఎంఏ నుండి టాటా సంస్థకు కీలక విజ్ఞప్తి :
IMA (ఇండియన్ మెడికల్ అసోసియేషన్) టాటా సన్స్‌కు రాసిన లేఖలో ఎయిర్ ఇండియా విమాన ప్రమాదంలో మరణించిన బీజే మెడికల్ కాలేజీ విద్యార్థుల కుటుంబాలకు, గాయపడిన వారికి పరిహారం, సహాయాన్ని అందించాలని స్పష్టంగా అభ్యర్థించింది.
ప్రమాదంలో ప్రాణాలు కోల్పోయిన ప్రతి ప్రయాణికుడు, సిబ్బంది కుటుంబాలకు రూ. 1 కోటి చొప్పున పరిహారం అందిస్తామని టాటా గ్రూప్ ఇదివరకే ప్రకటించిన నేపథ్యంలో, మరణించిన వైద్య విద్యార్థులకు కూడా అదే పరిహారం వర్తింపజేయాలని IMA విజ్ఞప్తి చేసింది. ప్రమాదంలో గాయపడిన విద్యార్థులకు మెరుగైన వైద్య సహాయం, ఆర్థిక తోడ్పాటును కూడా అందించాలని IMA ఈ లేఖ ద్వారా టాటా సన్స్ చైర్మన్ ఎన్. చంద్రశేఖరన్‌ను కోరింది. ఇది వైద్య సమాజం తరపున, బాధిత కుటుంబాల పట్ల మానవతా దృక్పథంతో చేసిన విజ్ఞప్తి అని IMA నొక్కి చెప్పింది.

బ్రిటన్ జాతీయుల కోసం రిసెప్షన్ సెంటర్ ఏర్పాటు :
అహ్మదాబాద్‌లో జరిగిన దురదృష్టకర ఎయిర్ ఇండియా విమాన ప్రమాదంలో 53 మంది బ్రిటన్ జాతీయులు మరణించినట్లు నిర్ధారణ అయ్యింది. ఈ విషాదకర ఘటన నేపథ్యంలో, భారత్‌లోని బ్రిటిష్ హైకమిషన్ బాధితుల కుటుంబాలు మరియు స్నేహితులకు అవసరమైన సహాయాన్ని అందించడానికి కీలక చర్యలు చేపట్టింది.
ప్రమాద స్థలానికి సమీపంలో, సర్దార్ వల్లభాయ్ పటేల్ అంతర్జాతీయ విమానాశ్రయం వద్ద ఒక ప్రత్యేక రిసెప్షన్ సెంటర్‌ను ఏర్పాటు చేసింది. ఈ కేంద్రం ప్రతిరోజూ ఉదయం 9 గంటల నుంచి రాత్రి 9 గంటల వరకు పనిచేస్తుందని బ్రిటిష్ హైకమిషన్ తమ అధికారిక ట్విట్టర్ ఖాతా ద్వారా వెల్లడించింది.

అహ్మదాబాద్ నుంచి లండన్ వెళ్తున్న ఎయిర్ ఇండియా బోయింగ్ 787-8 డ్రీమ్‌లైనర్ (AI171) గురువారం కూలిపోయింది. ఈ ఘోర ప్రమాదంలో విమానంలోని 241 మందితో పాటు, బీజే మెడికల్ కాలేజీ హాస్టల్‌పై పడటంతో నేలపై మరో 33 మంది కలిపి మొత్తం 274 మంది ప్రాణాలు కోల్పోయారు, కేవలం ఒకే ఒక్కరు ప్రాణాలతో బయటపడ్డారు.