మేడారంలోని సమ్మక్క గద్దె వద్ద భారీ రావి వృక్షం ఉండేది. ఎత్తైన ఈ వృక్షం సమ్మక్క గద్దెను ఆనుకొని ఉండడంతో చల్లటి నీడ ఇచ్చేది. 2012 వరకు ఈ రావి చెట్టు, దీనినే రేలా చెట్టుగా పిలుస్తుండేవారు. సమ్మక్క, సారలమ్మల దర్శనానికి వచ్చే భక్తులు ఈ రావి చెట్టు బెరడు, కొమ్మలు అమ్మవార్ల మహిమ కలిగి ఉంటాయనే నమ్మకంతో బెరడును, కొమ్మలను తెంపుకొని తీసుకెళ్లడం ప్రారంభించారు. క్రమక్రమంగా పూర్తిగా చెట్టు బెరడు పోవడంతో ఆ రావి చెట్టు నిలువునా ఎండిపోయింది. తిరిగి వృక్షాన్ని పరిరక్షించడానికి చెట్టు మొదలు, చుట్టూ ఇనుప జాలీలు, ఫెన్సింగ్ వేసినప్పటికీ లక్షల్లో వచ్చే భక్తులు బెరడును, కొమ్మలను తొలిచి తీసుకెళ్లడంతో ఆ చెట్టు నిలువునా ఎండిపోయింది. సమ్మక్క సారలమ్మలు గద్దెలపై వచ్చిన మరుసటి రోజు జాతర మూడో రోజు ఈ రావి చెట్టుపై ఒక నాగుపాము ప్రత్యక్షమై కొద్ది సేపటి అనంతరం మాయం అయిపోయేదని స్థానిక ఆదివాసీలు చెప్పారు. తిరిగి ఇటీవల ఇదే ప్రాంతంలో మరో రావి చెట్టును నాటి, దాని రక్షణకు మేడారం ట్రస్ట్ బోర్డు తగు రక్షణ చర్యలు చేపట్టింది.
