కేంద్రంలో కాంగ్రెస్ పార్టీ అధికారంలో ఉన్నప్పుడే దేశం అన్ని రంగాల్లో అభివృద్ధి చెందిందని మహబూబ్ నగర్ కాంగ్రెస్ ఎంపీ అభ్యర్థి చల్లా వంశీ చంద్ రెడ్డి పేర్కొన్నారు. ఎంపీ ఎన్నికల ప్రచారంలో భాగంగా శనివారం జడ్చర్ల మున్సిపాలిటీ పరిధిలోని కావేరమ్మపేట, బాదేపల్లి నేతాజీ చౌరస్తాలలో ఏర్పాటు చేసిన కార్నర్ మీటింగ్ లో కాంగ్రెస్ ఎంపీ అభ్యర్థి చల్లా వంశీచంద్ రెడ్డి, జడ్చర్ల ఎమ్మెల్యే జనంపల్లి అనిరుద్ రెడ్డి, యూత్ కాంగ్రెస్ రాష్ట్ర అధ్యక్షులు శివసేనారెడ్డి హాజరై మాట్లాడారు.
ఈ సందర్భంగా వంశీచంద్ రెడ్డి మాట్లాడుతూ కేంద్రంలో కాంగ్రెస్ అధికారంలోకి వస్తే పేదల బతుకులు బాగుపడతాయని అన్నారు. రాష్ట్ర ప్రభుత్వం ఇచ్చిన గ్యారంటీలతో పాటు అభివృద్ధికి పాటుపడే కాంగ్రెస్ పార్టీని పార్లమెంట్ ఎన్నికల్లో గెలిపించాలన్నారు. ఇక చేతల్లో అభివృద్ధిని చూపే కాంగ్రెస్ పార్టీ అభ్యర్థి నైన నన్ను ఈనెల 13న జరిగే పార్లమెంట్ ఎన్నికల్లో భారీ మెజారిటీతో గెలిపించాలని వంశీచంద్ రెడ్డి కోరారు. ఎమ్మెల్యే అనిరుద్ రెడ్డి మాట్లాడుతూ అటు కేంద్రంలో ఇటు రాష్ట్రంలో కాంగ్రెస్ పాలనలోనే పేదలకు సంక్షేమ పథకాలు అందుతాయని అన్నారు. పేదల సంక్షేమానికి పెద్దపీట వేస్తున్న కాంగ్రెస్ పార్టీ ఎంపీ అభ్యర్థి వంశీచంద్ రెడ్డిని భారీ మెజార్టీతో గెలిపించాలని అన్నారు.
కార్యక్రమంలో నాయకులు శివకుమార్, మాజీ సర్పంచ్ వెంకటేశం, లక్ష్మణ్, రమేష్ తదితరులు పాల్గొన్నారు.
