Tirumala: వేసవి సెలవుల నేపథ్యంలో తిరుమల గిరులు భక్తజనసందోహంతో పోటెత్తాయి. విద్యాసంస్థలకు సెలవులు, పరీక్షల ఫలితాలు విడుదలైన తరుణంలో మే నెలలో రికార్డు స్థాయిలో భక్తులు శ్రీవారిని దర్శించుకున్నట్లు తిరుమల తిరుపతి దేవస్థానం(TTD) పాలకమండలి అధికారికంగా ప్రకటించింది. గడిచిన మే నెలలో మొత్తం 25,46,168 మంది భక్తులు స్వామివారిని దర్శించుకోగా.. మే 24న అత్యధికంగా ఒకే రోజు 98,058 మంది భక్తులు తరలివచ్చినట్లు టీటీడీ వెల్లడించింది.

హుండీ కానుకల వర్షం: భక్తుల రద్దీకి అనుగుణంగానే శ్రీవారి హుండీ ఆదాయం కూడా భారీగా సమకూరింది. మే నెలలో స్వామివారి హుండీ ఆదాయం రూ. 120.28 కోట్లుగా నమోదైనట్లు అధికారులు తెలిపారు. అలాగే స్వామివారికి మొక్కులు చెల్లించుకునేందుకు 12,29,773 మంది భక్తులు తలనీలాలు సమర్పించారు. సమ్మర్ హాలిడేస్ ప్రభావం వల్ల పెరిగిన ఈ భక్త జనం రద్దీ.. జూన్ మొదటి రెండు వారాల పాటు కూడా ఇలాగే కొనసాగే అవకాశం ఉందని టీటీడీ పాలకమండలి అంచనా వేస్తోంది. కాబట్టి తిరుమల ప్రయాణాన్ని ప్లాన్ చేసుకునే భక్తులు ఈ రద్దీని దృష్టిలో ఉంచుకోవాలని అధికారులు సూచిస్తున్నారు.

మే నెల తిరుమల గణాంకాలు:

• మొత్తం దర్శనాలు: 25,46,168 మంది భక్తులు
• అత్యధికంగా ఒకే రోజు: 98,058 మంది (మే 24)
• హుండీ ఆదాయం: రూ. 120.28 కోట్లు
• తలనీలాలు సమర్పించిన వారు: 12,29,773 మంది