Ambati Rambabu| ఏపీలో కూటమి ప్రభుత్వం, విపక్ష వైసీపీ నేతల మధ్య మాటల తూటాలు పేలుతూనే ఉన్నాయి. ఒకరిపై ఒకరు విమర్శలు చేసుకుంటూనే ఉన్నారు. తాజాగా సీఎం చంద్రబాబుపై మాజీ మంత్రి అంబటి రాంబాబు సెటైర్లు వేశారు. దేశంలో జమిలి ఎన్నికలు వచ్చినా రాష్ట్రంలో 2029లోనే ఎన్నికలు ఉంటాయని.. షెడ్యూల్ ప్రకారం దేశంలో కూడా 2029లోనే జమిలి ఎన్నికలు జరుగుతాయని చంద్రబాబు వ్యాఖ్యానించారు. ఈ వ్యాఖ్యలపై అంబటి తనదైన శైలిలో స్పందిస్తూ ఎక్స్ వేదికగా పోస్టు చేశారు.
‘2027లోనే జమిలి అని బీజేపీ అంటోంది. జమిలి వచ్చినా 2029లోనే ఏపీ ఎన్నికలు అని చంద్రబాబు అంటున్నారు. చంద్రబాబూ.. నిజం కూడబలుక్కుని చెప్పండి’ అని ఆయన ట్వీట్ చేశారు. దీనికి బీజేపీ ఏపీ అధ్యక్షురాలు పురందేశ్వరిని ట్యాగ్ చేశారు. దీంతో అంబటి వ్యాఖ్యలపై టీడీపీ మద్దతుదారులు తీవ్ర విమర్శలు చేస్తున్నారు. షెడ్యూల్ ప్రకారం 2029లోనే జమిలి ఎన్నికలు జరుగుతాయంటూ కామెంట్స్ చేస్తున్నారు.
