AP Cabinet Postponed to November 10: నవంబర్ 7న జరగాల్సిన ఏపీ కేబినెట్‌ సమావేశం వాయిదా పడింది. కేబినెట్‌ భేటీని నవంబర్ 10న నిర్వహించాలని రాష్ట్ర ప్రభుత్వం నిర్ణయించింది. ఈ మేరకు నవంబర్ 10వ తేదీకి కేబినెట్‌ సమావేశాన్ని వాయిదా వేస్తూ సీఎస్‌ కార్యాలయం ఉత్తర్వులు జారీ చేసింది. మంత్రివర్గ సమావేశం నిర్వహణకు సంబంధించిన మార్పులను గమనించాల్సిందిగా అన్ని శాఖల కార్యదర్శులకు పలు కీలక సూచనలు చేసింది. అయితే, నవంబర్‌ 10న జరిగే కేబినెట్‌ భేటీలో పలు కీలక అంశాలు చర్చకు రానున్నాయి. త్వరలోనే విశాఖలో జరిగే పెట్టుబడుల సదస్సుపై మంత్రి వర్గం చర్చించనుంది. మంత్రులు అందరికీ సదస్సు నిర్వహణ బాధ్యతలు అప్పగించనున్నారు. ఇప్పటికే ఏర్పాట్లపై మంత్రి వర్గ ఉప సంఘాన్ని నియమించింది. దీంతో పాటు రాజధాని అమరావతి పనులు, భూముల కేటాయింపులపై కూడా మంత్రి వర్గ సమావేశంలో చర్చించి నిర్ణయం తీసుకోనున్నారు. అలాగే, శాంతి భద్రతల అంశంపై చర్చించి ఒక నిర్ణయం తీసుకునే అవకాశం ఉన్నట్లు తెలుస్తోంది. కాగా, రాష్ట్రంలో కొనసాగుతున్న మొంథా తుఫాన్ ప్రభావం కారణంగా కేబినెట్ భేటీని వాయిదా వేసినట్లు సమాచారం.

Also Read: https://teluguprabha.net/sports-news/australia-won-toss-in-woman-world-cup-second-semi-final/

మొంథా తుఫాన్ నష్టాలు, విశాఖ సదస్సు ఏర్పాట్లు..

మొంథా తుఫాన్ ప్రభావిత జిల్లాలకు ఆర్థిక సహాయం అందించే అంశంపై ఈ సమావేశంలో చర్చ జరగనుందని సమాచారం. తుఫాన్ వల్ల రైతులు, మత్స్యకారులు, గృహనిర్మాణ రంగం ఎదుర్కొన్న నష్టాలపై చర్చ జరగనుంది. అదేవిధంగా, రాబోయే విశాఖపట్నం గ్లోబల్ ఇన్వెస్టర్స్ సదస్సు ఏర్పాట్లపై కూడా చర్చించే అవకాశం ఉంది. ఈ సదస్సుకు దేశీయ, అంతర్జాతీయ పెట్టుబడిదారులు హాజరుకానున్నందున, ఏర్పాట్లను సమీక్షించడం కీలకంగా భావిస్తున్నారు. సీఎం చంద్రబాబు నాయుడు లండన్ పర్యటన నుంచి తిరిగి వచ్చిన వెంటనే కేబినెట్ భేటీ జరగనుంది. ఈ పర్యటనలో రాష్ట్ర పెట్టుబడులను ఆకర్షించే దిశగా పలు సంస్థలతో చర్చలు జరిపినట్లు తెలుస్తోంది. తిరిగి వచ్చిన తర్వాత, ఆ వివరాలను మంత్రివర్గ సమావేశంలో ప్రస్తావించి, రాష్ట్రానికి ఉపయోగపడే ఒప్పందాలపై నిర్ణయాలు తీసుకునే అవకాశం ఉంది. ఈ కేబినెట్ సమావేశంపై ప్రస్తుతం అన్ని వర్గాల దృష్టి కేంద్రీకృతమైంది. ఎందుకంటే ఈ భేటీలో రాష్ట్ర పరిపాలనకు సంబంధించిన ముఖ్య నిర్ణయాలు, బడ్జెట్ సమీక్షలు, కొత్త ఒప్పందాలపై చర్చ జరగనుంది. అలాగే, ఏపీ ప్రభుత్వం అమలు చేస్తున్న పలు సంక్షేమ కార్యక్రమాలపై కూడా చర్చ జరగనుంది. మొత్తం మీద, నవంబర్ 10న జరగబోయే ఈ కేబినెట్ భేటీలో కీలక అంశాలు చర్చకు రానున్నాయి.