విద్యుత్ ఉద్యోగుల సమస్యలపై ఉద్యోగసంఘాల జెఎసితో సచివాలయంలో ప్రభుత్వం జరిపిన చర్యలు ఫలించాయని రాష్ట్ర ఇంధనశాఖ మంత్రి పెద్దిరెడ్డి రామచంద్రారెడ్డి తెలిపారు. ఈ మేరకు చర్చల అనంతరం మంత్రి బొత్స సత్యనారాయణ, సీఎస్ జవహర్ రెడ్డి, స్పెషల్ సిఎస్ లు విజయానంద్, ఎస్ఎస్ రావత్ తదితరులతో కలిసి మీడియాతో మంత్రి పెద్దిరెడ్డి రామచంద్రారెడ్డి మాట్లాడారు.
ఉద్యోగ సంఘాల జెఎసితో జరిగిన చర్యలు సఫలమయ్యాయి. గురువారం నుంచి వారు చేపట్టబోయే సమ్మెను విరమించుకోవాలని ఉద్యోగ సంఘాలకు చేసిన విజ్ఞప్తికి వారు సానుకూలంగా స్పందించారు. సమ్మెను విరమించేందుకు అంగీకరించారు. 8 శాతం ఫిట్ మెంట్ ఇచ్చేందుకు ప్రభుత్వం అంగీకరించింది. అలాగే ఉద్యోగ సంఘాలు ప్రస్తావించిన పలు అంశాలపై కూడా సామరస్యపూర్వకంగా చర్చలు జరిగాయి. పలు అంశాలపై ప్రభుత్వం సానుకూలతను వ్యక్తం చేసింది. ఈ చర్చల సందర్భంగా తీసుకున్న నిర్ణయాలపై ఎల్లుండి ఉద్యోగ సంఘాల జెఎసితో ఒప్పందం చేసుకుంటాం. ఈ చర్చల్లో ప్రభుత్వం తరుఫున పాల్గొన్న అందరికీ ధన్యవాదాలు. అలాగే చర్చల్లో పాల్గొని సహకరించిన జెఎసి ప్రతినిధులకు కూడా ధన్యవాదాలు.