AP Government: రాష్ట్రంలోని విద్యా మరియు గ్రంథాలయ వ్యవస్థల బలోపేతానికి ప్రభుత్వం మరో కీలక అడుగు వేసింది. ఆంధ్రప్రదేశ్‌లో గల 13 జిల్లాలకు గ్రంథాలయ సంస్థల ఛైర్మన్లను నియమిస్తూ రాష్ట్ర ప్రభుత్వం తాజాగా ఉత్తర్వులు జారీ చేసింది. ముఖ్యమంత్రి చంద్రబాబు నాయుడు నేతృత్వంలోని ఎన్డీయే కూటమి ప్రభుత్వం, పాలనలో అన్ని భాగస్వామ్య పక్షాలకు ప్రాధాన్యత ఇస్తూ ఈ నియామకాలు చేపట్టింది.

ఈ నియామకాల్లో అధికార కూటమి పక్షాలకు స్థానం కల్పించారు. మొత్తం 13 ఛైర్మన్ పదవుల్లో 10 పదవులను తెలుగుదేశం పార్టీకి, 2 పదవులను జనసేన పార్టీకి, 1 భారతీయ జనతా పార్టీ కి కేటాయించారు.

నియమితులైన ఛైర్మన్లు తమ జిల్లాల్లోని గ్రంథాలయాల ఆధునికీకరణ, డిజిటలైజేషన్‌, పాఠకులకు మెరుగైన సౌకర్యాల కల్పనపై ప్రత్యేక దృష్టి సారించాలని ప్రభుత్వం ఆదేశించింది. కొత్త పాలకమండలి ఆధ్వర్యంలో గ్రంథాలయాలు కేవలం పుస్తకాల కేంద్రాలుగా కాకుండా, యువతకు జ్ఞాన సముపార్జన, నైపుణ్యాభివృద్ధి కేంద్రాలుగా మారాలని ప్రభుత్వం ఆకాంక్షిస్తోంది. నూతన ఛైర్మన్లకు ముఖ్యమంత్రి సహా కూటమి నేతలు శుభాకాంక్షలు తెలిపారు.