AP Job Calendar 2026 Latest News : ఏపీలో నిరుద్యోగ యువత చిరకాల వాంఛ నెరవేరబోతోంది. “ఆశల పల్లకి”లో ఊరేగుతున్న లక్షలాది మంది అభ్యర్థులకు కూటమి ప్రభుత్వం తీపి కబురు అందించేందుకు సిద్ధమైంది. కేవలం హామీలకే పరిమితం కాకుండా, చేతల్లో చూపేందుకు ‘జాబ్ క్యాలెండర్’ అనే బృహత్తర ప్రణాళికకు శ్రీకారం చుడుతోంది. రాబోయే ఉగాది నుంచి ఏటా క్రమబద్ధంగా ఉద్యోగాల భర్తీ చేపట్టడమే లక్ష్యంగా ప్రభుత్వం అడుగులు వేస్తోంది. ఇప్పటికే మెగా డీఎస్సీ, పోలీస్ నియామకాల్లో వేగం చూపిన సర్కార్, ఇప్పుడు అన్ని శాఖల్లోని ఖాళీలను ఒక్కతాటిపైకి తెస్తోంది. అసలు ఏయే శాఖల్లో ఎన్ని ఖాళీలు ఉన్నాయి? ఆర్థిక శాఖ ఆమోదం పొందిన పోస్టులెన్ని? మంత్రి నారా లోకేశ్ నేతృత్వంలో జరుగుతున్న ఈ భారీ ఆపరేషన్ వివరాలేమిటి?
నియామక పర్వం: పకడ్బందీగా డేటా సేకరణ : కూటమి ప్రభుత్వం అధికారంలోకి వచ్చిన వెంటనే నిరుద్యోగుల సమస్యలపై ప్రత్యేక దృష్టి సారించింది. గతంలో ఎన్నడూ లేని విధంగా 16,347 పోస్టులతో మెగా డీఎస్సీని కేవలం 150 రోజుల్లో పూర్తి చేసి రికార్డు సృష్టించింది. ఇప్పుడు అదే స్ఫూర్తితో అన్ని ప్రభుత్వ విభాగాల్లోని ఖాళీలపై కసరత్తు చేస్తోంది.
నిధి హెచ్ఆర్ఎంఎస్ పర్యవేక్షణ: ఆర్థిక శాఖ ఆధ్వర్యంలోని ‘నిధి’ పోర్టల్ ద్వారా రాష్ట్రంలోని ప్రతి శాఖలో మంజూరైన పోస్టులు, ఖాళీలు, కాంట్రాక్టు ఉద్యోగుల వివరాలను ప్రభుత్వం సేకరిస్తోంది. ఇప్పటి వరకు 157 విభాగాలు తమ వద్ద ఉన్న ఖాళీల వివరాలను ధృవీకరించాయి. దీని ప్రకారం కేవలం నేరుగా నియామకాల ద్వారా భర్తీ చేయాల్సిన పోస్టులే 99,000 వరకు ఉన్నట్లు తేలింది. ఇంకా కొన్ని శాఖల డేటా నమోదు ప్రక్రియ కొనసాగుతోంది.
నారా లోకేశ్ ప్రత్యేక పర్యవేక్షణ: విద్య, ఐటీ శాఖల మంత్రి నారా లోకేశ్ ఈ ప్రక్రియను వ్యక్తిగతంగా పర్యవేక్షిస్తున్నారు. “నిరుద్యోగికి భరోసా.. పాలనలో పారదర్శకత” అనే లక్ష్యంతో, ఏటా ఉగాదికి క్యాలెండర్ విడుదల చేసేలా యంత్రాంగాన్ని ఉరుకులు పెట్టిస్తున్నారు. క్యాలెండర్ ప్రకటించడమే కాకుండా, నిర్ణీత గడువులోగా పరీక్షలు నిర్వహించి నియామక పత్రాలు అందజేయాలని ముఖ్యమంత్రి చంద్రబాబు నాయుడు స్పష్టమైన ఆదేశాలు జారీ చేశారు.
శాఖల వారీగా ఖాళీల చిట్టా: ఎక్కడెక్కడ ఎన్ని : ఆర్థిక శాఖ వద్ద ఉన్న ప్రాథమిక సమాచారం ప్రకారం, ప్రధాన శాఖల్లో ఖాళీల వివరాలు ఇలా ఉన్నాయి:
పురపాలక, పట్టణాభివృద్ధి శాఖ: ఇక్కడ అత్యధికంగా 27,000 ఖాళీలు ఉండగా, అందులో 23,000 పోస్టులను నేరుగా నియామకాల ద్వారా భర్తీ చేయాల్సి ఉంది.
పంచాయతీరాజ్ శాఖ: సుమారు 26,000 నియామకాలు చేపట్టే అవకాశం ఉందని అంచనా.
పాఠశాల విద్యాశాఖ: బోధన, బోధనేతర విభాగాలు కలిపి దాదాపు 30,000 ఖాళీలు ఉండొచ్చని భావిస్తున్నారు.
ప్రజారోగ్యం, కుటుంబ సంక్షేమం: 10,000 వరకు నేరుగా నియామకాలు ఉండనున్నాయి.
రెవెన్యూ శాఖ: 13,000 మొత్తం ఖాళీల్లో, దాదాపు 2,552 పోస్టులు డైరెక్ట్ రిక్రూట్మెంట్కు సిద్ధంగా ఉన్నాయి.
ఉన్నత విద్య: విశ్వవిద్యాలయాల్లో కోర్టు కేసులు పరిష్కరించి 3,000 పైగా ఖాళీలను భర్తీ చేయనున్నారు.
సమర్థవంతమైన భర్తీ – ఇన్ సర్వీసు పదోన్నతులు : ప్రభుత్వం కేవలం కొత్త నియామకాలే కాకుండా, శాఖల్లో ఏళ్ల తరబడి పనిచేస్తున్న వారికి పదోన్నతుల ద్వారా కూడా ఖాళీలను భర్తీ చేస్తోంది. ఉదాహరణకు పంచాయతీరాజ్ శాఖలో 3,000 పోస్టులు ఇన్ సర్వీసు ప్రమోషన్లతో నిండనున్నాయి. ఈ ప్రక్రియ వల్ల పాలనలో అనుభవం ఉన్నవారికి మేలు జరగడమే కాకుండా, కింది స్థాయిలో కొత్త ఖాళీలు ఏర్పడి నిరుద్యోగులకు మరిన్ని అవకాశాలు లభిస్తాయి.