Good News For Employees: అసెంబ్లీ ఎన్నికల సమయంలో ఎన్నో హామీలు ఇచ్చిన ఆంధ్రప్రదేశ్ కూటమి ప్రభుత్వం అధికారంలోకి వచ్చినప్పటికీ, ఉద్యోగులు, పింఛన్‌దారుల కొంతమందిలో అసంతృప్తి వ్యక్తమవుతున్న నేపథ్యంలో ప్రభుత్వం ఓ శుభవార్తను ప్రకటించింది. ప్రభుత్వ ఉద్యోగుల్లో పెరుగుతున్న అసహనం దృష్టిలో పెట్టుకుని, వారి మనోభావాలను దృష్టిలో ఉంచుకుని కీలక నిర్ణయం తీసుకుంది.
ప్రభుత్వ ఉద్యోగులకు ఇంతకుముందు పెంచిన హౌస్ రెంట్ అలవెన్స్‌ (హెచ్‌ఆర్‌ఏ)ను మరో ఏడాది పాటు కొనసాగించనున్నట్లు ప్రభుత్వం అధికారికంగా ప్రకటించింది. ఈ మేరకు తాజాగా ఉత్తర్వులు కూడా విడుదల చేసింది. గతంలో, 2022లో వైఎస్సార్‌సీపీ హయాంలో ఈ భత్యాన్ని 24 శాతంగా పెంచిన సంగతి తెలిసిందే. ఇప్పుడు అదే పెంపు కొనసాగిస్తూ ప్రభుత్వం నిర్ణయం తీసుకుంది.
అయితే ఈ సవరణలు ప్రస్తుతం సచివాలయ ఉద్యోగులు, శాఖాధిపతులకే వర్తిస్తాయి అని ప్రభుత్వం స్పష్టం చేసింది. ఇది సాధారణ ఉద్యోగులందరికీ కాకపోవడం గమనార్హం. హైదరాబాద్‌లో పని చేస్తూ ఆ తరువాత అమరావతిలో స్థిరపడిన ఉద్యోగుల నేపథ్యంలో, వారికీ సౌకర్యంగా ఉండేలా గత ప్రభుత్వం హెచ్‌ఆర్‌ఏ పెంపు నిర్ణయం తీసుకుంది. ఇప్పుడు నూతన ప్రభుత్వం అదే విధానాన్ని కొనసాగిస్తోంది.
ఇంతకుముందు అమరావతిలో విధులు నిర్వహిస్తున్న ప్రభుత్వ ఉద్యోగులకు ఉచిత వసతి సౌకర్యం కల్పించిన విషయం తెలిసిందే. ఆ పథకాన్ని కూడా తాజాగా మరో ఏడాది పాటు పొడిగించింది. కుటుంబాలు హైదరాబాద్‌లో ఉండగా, ఉద్యోగులు మాత్రమే అమరావతిలో ఉంటున్న పరిస్థితిని దృష్టిలో పెట్టుకుని ఈ నిర్ణయం తీసుకున్నట్లు తెలుస్తోంది. ఇలా చేస్తూ, ప్రభుత్వం ఉద్యోగ వర్గాల్లో వ్యాపిస్తున్న అసంతృప్తిని కొంతమేరకి నియంత్రించేందుకు ప్రయత్నిస్తున్నట్టు స్పష్టమవుతోంది. అయితే మిగిలిన హామీలను ఎంతవరకు నెరవేరుస్తుందన్నది వచ్చే రోజుల్లో తేలనుంది.
