AP Govt : ఆంధ్రప్రదేశ్ ప్రభుత్వం మహిళా సాధికారత, వ్యవసాయ రంగం అభివృద్ధిని లక్ష్యంగా చేసుకుని వినూత్నమైన పథకాన్ని ప్రవేశపెట్టింది. ఈ పథకం కింద రాష్ట్రంలోని స్వయం సహాయక సంఘాల (డ్వాక్రా) మహిళలకు రాయితీపై డ్రోన్లను అందించే ప్రక్రియ ప్రారంభమైంది. ఇది డ్వాక్రా మహిళలకు కొత్త ఆదాయ వనరులను సృష్టించడమే కాకుండా, వ్యవసాయంలో డ్రోన్ల వినియోగాన్ని ప్రోత్సహించడం ద్వారా రైతులకూ ఎంతో ప్రయోజనం చేకూర్చనుంది.
ఆర్థిక చేయూత, ఆధునిక పరిజ్ఞానం
ఈ పథకంలో భాగంగా, రూ. 10 లక్షల విలువైన డ్రోన్‌ను డ్వాక్రా బృందాలకు కేవలం రూ. 2 లక్షలకే, అంటే 80% రాయితీతో అందజేయనున్నారు. మిగిలిన మొత్తాన్ని శ్రీనిధి లేదా ఇతర వాలంటరీ సంస్థల ద్వారా రుణంగా పొందవచ్చు. ఈ పథకం కేవలం డ్రోన్లను ఇవ్వడానికే పరిమితం కాదు, ఎంపికైన మహిళలకు వాటిని నడపడంపై 15 రోజుల పాటు ప్రత్యేక శిక్షణ ఇస్తారు. అంతేకాకుండా, వారి కుటుంబ సభ్యులకు ఐదు రోజుల పాటు డ్రోన్ మెకానిక్‌లుగా శిక్షణ ఇచ్చి, చిన్నపాటి రిపేర్లు వారే చేసుకునేలా తీర్చిదిద్దుతారు.
రైతులకు డ్రోన్ల వలన లాభాలు
వ్యవసాయ రంగంలో డ్రోన్ల వాడకం వల్ల అనేక ప్రయోజనాలు ఉన్నాయి. ఒక ఎకరం పొలంలో పురుగు మందులు పిచికారీ చేయడానికి కేవలం 5 నుంచి 7 నిమిషాలు మాత్రమే పడుతుంది.
రసాయనాలు నేరుగా చేతితో పిచికారీ చేయడం వల్ల కలిగే ఆరోగ్య సమస్యలను నివారిస్తుంది.డ్రోన్ల ద్వారా కచ్చితమైన మోతాదులో పురుగు మందులు పిచికారీ చేయవచ్చం కాబట్టి, ఔషధాల వృధా గణనీయంగా తగ్గుతుంది. డ్రోన్ యజమానులు రోజుకు ఎనిమిది గంటల వరకు వాటిని ఉపయోగించవచ్చు. తమ పొలాలకు వాడిన తర్వాత, ఇతరులకు అద్దెకు ఇవ్వడం ద్వారా కూడా అదనపు ఆదాయం సంపాదించుకోవచ్చు.
ఈ వినూత్నమైన పథకం ద్వారా, ప్రభుత్వం ఒకే దెబ్బకు రెండు పిట్టలు కొడుతోంది. ఒకవైపు డ్వాక్రా మహిళలకు ఆర్థిక స్వావలంబన కల్పిస్తూ, మరోవైపు వ్యవసాయ రంగంలో ఆధునిక సాంకేతికతను ప్రోత్సహిస్తోంది. ఈ డ్రోన్లు వ్యవసాయంలో సమూల మార్పులు తీసుకొచ్చి, రైతులు, మహిళలు ఇద్దరికీ మేలు చేస్తాయని నిపుణులు అభిప్రాయపడుతున్నారు.
