Andhra Pradesh Water Transport: రాష్ట్ర ఆర్థిక వ్యవస్థకు బలం చేకూర్చే దిశగా ఆంధ్రప్రదేశ్‌కు అతిపెద్ద శుభవార్త అందింది! ముంబైలో జరుగుతున్న ప్రతిష్టాత్మక ఇండియా మారిటైమ్ వీక్ -2025 సదస్సులో భాగంగా, ఆంధ్రప్రదేశ్‌లో అంతర్గత జలమార్గాల (Inland Waterways) అభివృద్ధికి కేంద్ర, రాష్ట్ర ప్రభుత్వాల మధ్య చారిత్రాత్మక ఒప్పందం (MoU) కుదిరింది.

ఈ కీలక ఒప్పందంలో, కేంద్ర జలమార్గాల సంస్థ ఇన్ ల్యాండ్ వాటర్ వేస్ అథారిటీ ఆఫ్ ఇండియా (IWAI), రాష్ట్ర ప్రభుత్వ సంస్థ ఏపీ ఇన్ ల్యాండ్ వాటర్ వేస్ అథారిటీతో భాగస్వామ్యం కుదుర్చుకుంది. రాష్ట్రంలో అంతర్గత జలమార్గాల మౌలిక వసతులను బలోపేతం చేసే లక్ష్యంతో, కేంద్ర సంస్థ రూ. 150 కోట్లు పెట్టుబడులు పెట్టనున్నట్లు ప్రకటించింది.

రోడ్లు, భవనాలు, పెట్టుబడుల శాఖ మంత్రి బీసీ జనార్ధన్‌ రెడ్డి ఆధ్వర్యంలో ఇరుపక్షాల అధికారులు ఒప్పంద పత్రాలను పరస్పరం మార్చుకున్నారు. ఈ సందర్భంగా మంత్రి మాట్లాడుతూ, “ఈ ఒప్పందం రాష్ట్ర లాజిస్టిక్స్ రంగానికి ఒక కీలక మలుపు. అంతర్గత జలమార్గాల అభివృద్ధి ద్వారా వస్తు, సరకు రవాణా వ్యయం (Logistics Cost) గణనీయంగా తగ్గుతుంది. ఇది రాష్ట్ర పరిశ్రమలకు, రైతులకు, వ్యాపారులకు భారీ ఊరటనిస్తుంది. తక్కువ ఖర్చుతో కూడిన ఈ రవాణా మార్గం రాష్ట్రాన్ని జాతీయ వాణిజ్య కేంద్రంగా మారుస్తుంది,” అని ధీమా వ్యక్తం చేశారు.

ఈ భారీ పెట్టుబడితో, ఆంధ్రప్రదేశ్‌లో నదులు, కాలువల ఆధారంగా రవాణా వ్యవస్థ మెరుగుపడి, రాష్ట్రంలో ఆర్థిక వృద్ధికి, ఉపాధి కల్పనకు కొత్త మార్గాలు తెరుచుకోనున్నాయి.