liquor digital payments:ఆంధ్రప్రదేశ్లో మద్యం కొనుగోలుదారులకు ఉపశమనం కలిగించే కీలక నిర్ణయాన్ని కూటమి ప్రభుత్వం త్వరలో ప్రకటించనుంది. రాష్ట్ర ఎక్సైజ్ శాఖ మద్యం విక్రయాల్లో డిజిటల్ చెల్లింపులను పూర్తిస్థాయిలో అమలు చేయడానికి ప్రత్యేక విధానాన్ని సిద్ధం చేసింది. లిక్కర్ డిజిటల్ చెల్లింపులు పేరుతో తీసుకురానున్న ఈ పాలసీ అమలులోకి వస్తే రాష్ట్రంలోని ప్రతి మద్యం షాపు, బార్లో డిజిటల్ పేమెంట్ సౌకర్యం తప్పనిసరిగా అందుబాటులో ఉండాలి.
డిజిటల్ చెల్లింపులు…
ప్రస్తుతం కొన్ని దుకాణాల్లో డిజిటల్ చెల్లింపులు స్వీకరిస్తున్నప్పటికీ, అది పూర్తిస్థాయిలో అమలు కావడం లేదు. కొత్త విధానం ప్రకారం కస్టమర్ నగదు కాకుండా యూపీఐ, కార్డు లేదా ఇతర డిజిటల్ మార్గాల ద్వారా చెల్లించాలనుకుంటే షాపు యజమానులు నిరాకరించలేరు. డిజిటల్ లావాదేవీలను తప్పనిసరిగా స్వీకరించాల్సి ఉంటుంది. దీనివల్ల వినియోగదారులకు చెల్లింపులో సౌలభ్యం కలగడంతో పాటు విక్రయాల్లో పారదర్శకత పెరుగుతుందని ప్రభుత్వం భావిస్తోంది.
Also Read: https://teluguprabha.net/andhra-pradesh-news/tomato-prices-have-dropped-in-telugu-states/
రాబోయే మంత్రివర్గ సమావేశంలో…
ఈ ప్రతిపాదనకు సంబంధించిన ఫైల్ను ఎక్సైజ్ శాఖ సిద్ధం చేసింది. రాబోయే మంత్రివర్గ సమావేశంలో ఈ అంశాన్ని కేబినెట్ ముందుంచనున్నారు. మంత్రివర్గ ఆమోదం లభించిన వెంటనే ఈ కొత్త విధానం అమలులోకి రానుంది. అధికారుల అంచనాల ప్రకారం నెలరోజుల్లోనే ఈ వ్యవస్థ అమలుకు వస్తుంది.
ప్రస్తుతం రాష్ట్రంలో మద్యం విక్రయాల్లో సుమారు 30 శాతం వరకు మాత్రమే డిజిటల్ చెల్లింపులు జరుగుతున్నాయి. ఈ శాతాన్ని 60 శాతానికి పెంచడమే ప్రభుత్వ లక్ష్యంగా ఉంది. డిజిటల్ లావాదేవీలను ప్రోత్సహించడం ద్వారా ఆదాయ లావాదేవీలు స్పష్టంగా నమోదవుతాయని, అక్రమాల అవకాశాలు తగ్గుతాయని ఎక్సైజ్ శాఖ అభిప్రాయపడుతోంది.
డిజిటల్ చెల్లింపుల నిబంధన…
ఇప్పటికే డిజిటల్ చెల్లింపుల నిబంధన అమల్లో ఉన్నప్పటికీ, చాలా దుకాణాల్లో ఇది పాటించడం లేదు. ప్రతి సారి కొత్త పాలసీ వచ్చినప్పుడు ఈ నిబంధనను చేర్చాల్సిన పరిస్థితి ఏర్పడుతోంది. అందుకే శాశ్వతంగా అమలయ్యేలా ప్రత్యేక విధానాన్ని రూపొందించారు. ఈసారి అమలులోకి వచ్చిన తర్వాత డిజిటల్ చెల్లింపులను తిరస్కరించే అవకాశం ఉండదు.
ఎక్సైజ్ శాఖ డేటాబేస్లో…
కొత్త విధానం అమల్లో భాగంగా ప్రతి లావాదేవీ రియల్ టైమ్లో ఎక్సైజ్ శాఖ డేటాబేస్లో నమోదు అవుతుంది. ఏ రోజున ఎంత మద్యం అమ్ముడైందో అధికారులకు తక్షణ సమాచారం అందుబాటులో ఉంటుంది. ఉత్పత్తి దశ నుంచి వినియోగదారుని చేతికి సీసా చేరే వరకు ప్రతి దశను డిజిటల్ రూపంలో నమోదు చేసేలా చర్యలు తీసుకోనున్నారు.
ట్రాక్ అండ్ ట్రేస్ విధానాన్ని..
దీనికి తోడుగా ట్రాక్ అండ్ ట్రేస్ విధానాన్ని కూడా ప్రవేశపెట్టనున్నారు. ప్రతి మద్యం సీసాను స్కాన్ చేసిన తరువాతే వినియోగదారునికి అందించాల్సి ఉంటుంది. ఇందుకోసం అవసరమైన స్కానర్లను ప్రభుత్వం షాపులు, బార్లకు అందించనుంది. స్కానింగ్ పూర్తయ్యాకే బిల్లింగ్ ప్రక్రియ పూర్తవుతుంది. కస్టమర్ డిజిటల్ చెల్లింపు చేసిన వెంటనే ఆ సమాచారం ఎక్సైజ్ శాఖకు చేరుతుంది.
మద్యం విక్రయాల్లో పూర్తిస్థాయి…
ఈ చర్యలతో మద్యం విక్రయాల్లో పూర్తిస్థాయి పర్యవేక్షణ సాధ్యమవుతుందని అధికారులు చెబుతున్నారు. ఆదాయంలో పారదర్శకత పెరగడంతో పాటు ప్రభుత్వానికి ఖచ్చితమైన గణాంకాలు అందుతాయని భావిస్తున్నారు. అలాగే వినియోగదారులు నగదు సమస్యల వల్ల ఇబ్బంది పడకుండా సులభంగా చెల్లింపులు చేయగలుగుతారు.