ప్రముఖ నటుడు బాలకృష్ణ (Nandamuri Balakrishna)కు.. కేంద్రం పద్మ భూషణ్ ప్రకటించింది. సిని, రాజకీయ, సమాజ సేవలో చేసిన అద్భుత కృషికి ఈ అవార్డు దక్కింది. తెలుగు సినిమా రంగానికి విశేష కృషి చేసిన నందమూరి బాలకృష్ణకు పద్మ భూషణ్ అవార్డు ప్రదానం చేయడంపై సినీ ప్రముఖులతో పాటు.. రాజకీయ ప్రముఖులు కూడా అభినందనలు తెలుపుతున్నారు. బాలకృష్ణకు పద్మ భూషణ్ అవార్డు దక్కడంపై.. ఏపీ సీఎం చంద్రబాబు (chandrababu) అభినందనలు తెలిపారు. NTR వారసత్వాన్ని నిలబెడుతూ సినిమా, రాజకీయ రంగాల్లో బాలకృష్ణ రాణిస్తున్నారని చంద్రబాబు అన్నారు. ఎంతో మంది జీవితాలకు స్ఫూర్తినిస్తున్న నిజమైన ఐకానిక్‌ నాయకుడికి తగిన గౌరవం లభించిందని సీఎం చంద్రబాబు తెలిపారు.
బాలకృష్ణకు పద్మభూషణ్ అవార్డు రావడంపై.. మంత్రి నారా లోకేష్ స్పందించారు. మామయ్యకు ప్రతిష్టాత్మక పద్మభూషణ్ అవార్డు రావటం ఎంతో గర్వకారణమని లోకేష్ ట్వీట్ చేశారు. ఈ సందర్భంగా బాలకృష్ణకు హృదయపూర్వక అభినందనలు తెలిపారు. సినిమా, రాజకీయ, ప్రజా సేవలకు.. ఈ అవార్డు నిదర్శనమన్నారు. బాలకృష్ణ విజయాలకు గుర్తించినందుకు సంతోషంగా ఉందని.. ట్వీట్ చేశారు.
బాలకృష్ణకు సినీ, రాజకీయ సేవలో ఆయనకు తగిన గుర్తింపు దక్కింది అని జూనియర్ ఎన్టీఆర్ పేర్కొన్నారు. పద్మభూషణ్ అవార్డు అందుకున్న బాలయ్య బాబాయికి హృదయపూర్వక అభినందనలు. ఈ గుర్తింపు సినిమా రంగానికి మీరు చేసిన అసమానమైన సేవలకు, మీ నిర్విరామ ప్రజాసేవకు నిదర్శనం అని ఎన్టీఆర్ ట్వీట్ చేశారు.
నటజీవితంలో స్వర్ణోత్సవాన్ని జరుపుకొన్న బాలకృష్ణ.. తెలుగు సినిమా ఎదుగుదలకు ఎంతో అకుంఠిత భావంతో సేవ చేశారని.. శ్రీభరత్ తెలిపారు. విభిన్న పాత్రలతో ప్రేక్షకుల మనసులు గెలుచుకున్న ఆయన.. ఎన్నో సంవత్సరాలుగా సమాజ సేవ చేస్తున్నారని పేర్కొన్నారు. బాలకృష్ణ మరెన్నో గౌరవాలు అందుకోవాలని హృదయపూర్వకంగా కోరుకుంటున్నట్లు తెలిపారు. నందమూరి కళ్యాణ్ రామ్ కూడా బాలకృష్ణకు అభినందనలు తెలిపారు. బాబాయ్ నిర్విరామ కృషికి నిజమైన గుర్తింపు ఈ అవార్డ్ అని ఆయన అన్నారు. వీరితో పాటు పలువురు సినీ, రాజకీయ ప్రముఖులు బాలకృష్ణకు అభినందనలు తెలిపారు.
