Bihar Elections: ప్రస్తుతం దేశ రాజకీయాలు ఊహించని మలుపులు తిరుగుతున్నాయి. ఉపరాష్ట్రపతి ఎన్నికల పోరులో ఎన్డీఏ, ఇండియా కూటముల మధ్య గట్టి పోటీ నెలకొంది. సంఖ్యా బలం ఎన్డీఏకు అనుకూలంగా ఉన్నప్పటికీ, క్రాస్ ఓటింగ్‌పై ఇండియా కూటమి ఆశలు పెట్టుకుంది. అయితే, కేవలం ఉపరాష్ట్రపతి ఎన్నికలకే పరిమితం కాకుండా, రాబోయే బీహార్, పశ్చిమ బెంగాల్, అస్సాం అసెంబ్లీ ఎన్నికల్లో బీజేపీని ఓడించడం ద్వారా ప్రధాని మోడీ హవాను తగ్గించాలన్నది ఇండియా కూటమి వ్యూహం.
ఈ కీలక సమయంలో, బీహార్ ఎన్నికల్లో గెలుపు ఎన్డీఏకు అనివార్యంగా మారింది. గెలుపొందకపోతే రాజకీయంగా కఠిన పరిస్థితులు ఎదురవుతాయని బీజేపీ అంచనా వేస్తోంది. ఈ నేపథ్యంలోనే, బీహార్ ముఖ్యమంత్రి నితీష్ కుమార్, బీజేపీ పెద్దలు ఆంధ్రప్రదేశ్ ముఖ్యమంత్రి చంద్రబాబు నాయుడు సహాయం కోరినట్లు ప్రచారం జరుగుతోంది.
మోడీ కంటే సీనియర్, నితీష్‌కు సమకాలీకుడు
భారత రాజకీయ చరిత్రలో చంద్రబాబు నాయుడు అత్యంత సీనియర్ నాయకులలో ఒకరు. ప్రధానమంత్రి నరేంద్ర మోడీ కంటే ఎక్కువ అనుభవం ఉన్న నాయకుడిగా ఆయన్ని స్వయంగా మోడీ సైతం గౌరవిస్తారు. అదేవిధంగా, చంద్రబాబుకు నితీష్ కుమార్ సమకాలీకుడు, ఇద్దరి మధ్య మంచి సంబంధాలు ఉన్నాయి. అందుకే బీహార్‌లో మళ్లీ గెలిచేందుకు నితీష్ కుమార్, చంద్రబాబును ఆశ్రయించినట్లు సమాచారం. ఎన్డీఏలో చంద్రబాబు కీలక భాగస్వామిగా ఉన్నందున, బీజేపీ పెద్దలు కూడా బీహార్ ఎన్నికల బాధ్యతను ఆయనకు అప్పగించినట్లు తెలుస్తోంది.
ఆంధ్రప్రదేశ్ ‘సక్సెస్ ఫార్ములా’ బీహార్‌కు
బీహార్ ఎన్నికల్లో అనుసరించాల్సిన వ్యూహంపై చంద్రబాబు ఇప్పటికే నితీష్ కుమార్‌కు ఒక ప్రత్యేక నివేదికను సమర్పించినట్లు తెలుస్తోంది. ప్రధానంగా, ఏపీ ఎన్నికల్లో టీడీపీ విజయానికి ప్రధాన కారణమైన మహిళా పథకాలను బీహార్‌లో అమలు చేయాలని చంద్రబాబు సూచించినట్లు ప్రచారం జరుగుతోంది. మహిళలకు వీలైనన్ని పథకాలు అందిస్తే, ప్రజలు తప్పకుండా నమ్ముతారని, తద్వారా బీహార్‌లో ఎన్డీఏ గెలుపు ఖాయమని చంద్రబాబు చెప్పారని సమాచారం.
చంద్రబాబు సలహా మేరకు నితీష్ కుమార్ ఇటీవల ఒక కొత్త పథకాన్ని ప్రారంభించారు. ప్రతి కుటుంబంలో మహిళ బ్యాంకు ఖాతాలో రూ. 10 వేలు జమ చేయడంతో పాటు, స్వయం ఉపాధిలో ఆరు నెలల కాలంలో అభివృద్ధి సాధిస్తే రూ. 2 లక్షల సాయం అందించే పథకానికి శ్రీకారం చుట్టారు. ఇది చంద్రబాబు సూచించిన వ్యూహంలో భాగమని విశ్లేషకులు చెబుతున్నారు. ఈ ఒక్క పథకంతోనే నితీష్ కుమార్ మహిళల ఓట్లను గెలుచుకుంటారని భావిస్తున్నారు.
ఇండియా కూటమిలో ఆందోళన
జాతీయ స్థాయిలో చంద్రబాబుకు ఉన్న విస్తృత పరిచయాలు, వ్యూహాత్మక సామర్థ్యం కారణంగానే కేంద్ర పెద్దలు ఆయనకు ప్రత్యేక గౌరవం ఇస్తున్నారని అంటున్నారు. ఇప్పుడు బీహార్ ఎన్నికల బాధ్యత చంద్రబాబుకు అప్పగించడంతో ఇండియా కూటమిలో ఆందోళన మొదలైంది. నితీష్ కుమార్, నరేంద్ర మోడీ దూకుడుకు చంద్రబాబు వ్యూహాలు తోడైతే, బీహార్‌లో ఇబ్బందికర పరిస్థితులు తప్పవని ఇండియా కూటమి నేతలు భావిస్తున్నారు. మరి బీహార్ ఎన్నికల ఫలితాలు ఎలా ఉంటాయో చూడాలి.
