CM Chandrababu Naidu : ఆంధ్రప్రదేశ్ ముఖ్యమంత్రి నారా చంద్రబాబు నాయుడు రాష్ట్ర రైతాంగానికి ఊహించని శుభవార్త చెప్పారు. ఉల్లిపాయ పంట పండించిన ప్రతి రైతుకు హెక్టారుకు రూ.50,000 ఆర్థిక సాయం అందించనున్నట్లు ఆయన ప్రకటించారు. రాష్ట్ర చరిత్రలో ఉల్లి రైతులకు ఇంత పెద్ద మొత్తంలో సాయం ప్రకటించడం ఇదే తొలిసారి.
ఈ నిర్ణయం రైతుల కష్టాలను అర్థం చేసుకుని, వారిని ఆదుకోవాలన్న ప్రభుత్వ సంకల్పానికి నిదర్శనమని వ్యవసాయ శాఖ మంత్రి అచ్చెన్నాయుడు తెలిపారు. ఇటీవల కాలంలో ఉల్లి ధరలు భారీగా పడిపోవడంతో రైతులు తీవ్ర నష్టాలను ఎదుర్కొన్నారు. పంటకు పెట్టిన పెట్టుబడి కూడా రాని పరిస్థితి నెలకొంది. ఈ విపత్కర పరిస్థితుల్లో ముఖ్యమంత్రి చంద్రబాబు నాయుడు రైతులను ఆదుకోవాలని నిర్ణయించుకున్నారు. గతంలో ఏ ప్రభుత్వం కూడా ఇంత ఉదారంగా రైతులను ఆదుకున్న దాఖలాలు లేవు అని చెప్పారు..
ముఖ్యమంత్రి తన నిర్ణయాన్ని ప్రకటిస్తూ, రైతుల కన్నీళ్లు తుడవడమే తమ ప్రభుత్వ ప్రధాన లక్ష్యమని మంత్రి అచ్చెన్నాయుడు స్పష్టం చేశారు. కేవలం ధరలు పడిపోయినప్పుడు మాత్రమే కాకుండా, ప్రకృతి వైపరీత్యాలు సంభవించినప్పుడు కూడా ప్రభుత్వం రైతులకు అండగా ఉంటుందని భరోసా ఇచ్చారు. ఈ ఆర్థిక సాయం రైతులకు కొత్త ఉత్సాహాన్ని ఇస్తుందని, ఆర్థికంగా వెన్నుదన్నుగా ఉంటుందని పేర్కొన్నారు.
ఈ పథకం కింద అర్హులైన రైతులను గుర్తించేందుకు అధికారులు వెంటనే చర్యలు తీసుకోవాలని ముఖ్యమంత్రి ఆదేశించారు. రైతులకు ఈ సాయాన్ని త్వరితగతిన అందించాలని, ఎలాంటి జాప్యం లేకుండా చూడాలని సూచించారు. రైతుల సంక్షేమానికి కట్టుబడి ఉన్నామని, వ్యవసాయ రంగాన్ని లాభదాయకంగా మార్చేందుకు కృషి చేస్తామని చంద్రబాబు పునరుద్ఘాటించారు. ఈ నిర్ణయం రాష్ట్రవ్యాప్తంగా ఉల్లి రైతుల్లో సంతోషాన్ని నింపింది
