Andhra Pradesh Innovation Ecosystem : ఆంధ్రప్రదేశ్ ఆవిష్కరణల చరిత్రలో ఒక కొత్త అధ్యాయం లిఖించబడింది. యువత ఆలోచనలకు రెక్కలు తొడిగి, ఆవిష్కరణల ఆకాశంలోకి ఎగిరేలా చేసే బృహత్తర కార్యాచరణకు రాష్ట్ర ప్రభుత్వం శ్రీకారం చుట్టింది. ముఖ్యమంత్రి నారా చంద్రబాబు నాయుడు, ఐటీ శాఖామంత్రి నారా లోకేశ్‌తో కలిసి మంగళగిరి సమీపంలోని మయూరి టెక్ పార్క్ ప్రాంగణంలో ప్రతిష్టాత్మక ‘రతన్‌టాటా ఇన్నోవేషన్‌ హబ్‌’ (RTIH)ను బుధవారం లాంఛనంగా ప్రారంభించారు. ఈ చారిత్రాత్మక ఘట్టం రాష్ట్ర భవిష్యత్తుపై చెరగని ముద్ర వేయనుందని విశ్లేషకులు అభిప్రాయపడుతున్నారు. కేవలం ఒక భవనాన్ని ప్రారంభించడమేనా ఇది..? లేక లక్షలాది యువత తలరాతలను మార్చే ఒక మహాయజ్ఞానికి నాంది వాచకమా.?

ఆవిష్కరణల ఆశల సౌధం : దార్శనిక పారిశ్రామికవేత్త, దివంగత రతన్ టాటా స్ఫూర్తితో, ఆయన వారసత్వాన్ని స్మరించుకుంటూ ఈ ఇన్నోవేషన్ హబ్‌కు ఆయన పేరు పెట్టాలని ముఖ్యమంత్రి చంద్రబాబు నాయుడు నిర్ణయించారు. రాష్ట్రంలో నూతన ఆవిష్కరణలు, స్టార్టప్‌లు, నైపుణ్యాభివృద్ధిని ప్రోత్సహించడమే లక్ష్యంగా ఈ కేంద్రాలను నెలకొల్పారు. కేవలం ఉద్యోగాలు వెతుక్కునే యువతను, ఉద్యోగాలు సృష్టించే సత్తా ఉన్న పారిశ్రామికవేత్తలుగా మార్చాలన్నదే ప్రభుత్వ దార్శనికత.

హబ్ స్వరూపమిదీ : ప్రధాన కేంద్రం (Hub): అమరావతి రాజధాని పరిధిలోని మంగళగిరిలో సుమారు 50 వేల చదరపు అడుగులకు పైగా విస్తీర్ణంలో ఈ ప్రధాన హబ్‌ను ఏర్పాటు చేశారు. డీప్ టెక్, ఆర్టిఫిషియల్ ఇంటెలిజెన్స్, సుస్థిరత వంటి అత్యాధునిక రంగాలపై ఇది దృష్టి సారిస్తుంది.

అనుబంధ కేంద్రాలు (Spokes): ఈ ప్రధాన హబ్‌కు అనుబంధంగా రాష్ట్రంలోని ఐదు కీలక నగరాలైన విశాఖపట్నం, రాజమండ్రి, విజయవాడ, తిరుపతి, అనంతపురంలో జోనల్ కేంద్రాలను ఏర్పాటు చేశారు.ముఖ్యమంత్రి చంద్రబాబు మంగళగిరి నుంచే ఈ ఐదు కేంద్రాలను వర్చువల్‌గా ప్రారంభించారు.

లక్ష్యం:  రాబోయే ఐదేళ్లలో లక్ష మంది యువతకు ఉపాధి అవకాశాలు కల్పించడమే ధ్యేయంగా ఈ హబ్‌ను తీర్చిదిద్దారు.  స్టార్టప్‌లకు ఇంక్యుబేషన్, మేధో సంపత్తి హక్కుల (IPR) మద్దతు, నైపుణ్యాల పెంపు, డిజిటల్ పరివర్తన వంటి సేవలను ఈ హబ్ అందిస్తుంది.

ప్రభుత్వ దార్శనికత – పటిష్ఠ కార్యాచరణ : గతంలోనే పారిశ్రామిక విధానాలపై సమీక్ష నిర్వహించిన ముఖ్యమంత్రి, ఉద్యోగ కల్పనే ప్రభుత్వ ప్రథమ ప్రాధాన్యత అని స్పష్టం చేశారు. కేవలం “ఈజ్ ఆఫ్ డూయింగ్ బిజినెస్” మాత్రమే కాదని, “స్పీడ్ ఆఫ్ డూయింగ్ బిజినెస్” కూడా ముఖ్యమని ఆయన అధికారులకు దిశానిర్దేశం చేశారు. ఈ హబ్ ఏర్పాటు కోసం రాష్ట్ర ప్రభుత్వం మయూరి టెక్ పార్కులో ఇంటీరియర్స్, ఇతర పనుల నిమిత్తం ఇప్పటికే రూ.13.96 కోట్లు ఖర్చు చేసింది. ఇది యువత భవిష్యత్తుపై ప్రభుత్వానికి ఉన్న చిత్తశుద్ధికి నిదర్శనం.
ఈ ప్రారంభోత్సవ కార్యక్రమంలో ముఖ్యమంత్రితో పాటు టాటా గ్రూప్ ఛైర్మన్ నటరాజన్ చంద్రశేఖరన్, రాష్ట్ర ఐటీ మరియు ఎలక్ట్రానిక్స్ శాఖామంత్రి నారా లోకేశ్, పలువురు పారిశ్రామికవేత్తలు, ఉన్నతాధికారులు పాల్గొన్నారు. సిలికాన్ వ్యాలీ తరహా పర్యావరణ వ్యవస్థను రాష్ట్రంలో సృష్టించాలనే లక్ష్యంతో ఈ హబ్ పనిచేస్తుందని, స్థానిక పెట్టుబడులకు, యువత మేధస్సుకు ఇది వేదికగా నిలుస్తుందని ప్రభుత్వం విశ్వాసం వ్యక్తం చేసింది.