Andhra Pradesh cyclone damage report : సాంకేతికతను వాడుకుని, ముందస్తు హెచ్చరికలతో ‘మొంథా’ తుపాను సమయంలో ప్రాణనష్టం జరగకుండా కంటికి రెప్పలా కాపాడినా, ప్రకృతి ప్రకోపం ముందు ఆస్తి నష్టాన్ని ఆపలేకపోయాం. మొంథా తుపాను ఆంధ్రప్రదేశ్ రాష్ట్ర ఆర్థిక వ్యవస్థపై పెను గాయం చేసింది. రాష్ట్ర ప్రభుత్వం కేంద్రానికి సమర్పించిన ప్రాథమిక నివేదిక ప్రకారం, తుపాను మిగిల్చిన నష్టం అక్షరాలా రూ.5,244 కోట్లు. ఈ ప్రళయానికి రోడ్లు కొట్టుకుపోయాయి, పంటలు నీట మునిగాయి, వేల ఇళ్లు దెబ్బతిన్నాయి. ఇంతకీ ఏ రంగం ఎంతలా దెబ్బతింది? ఈ నష్టం ఎంత తీవ్రంగా ఉంది?

అంకెల అద్దంలో విధ్వంసం : రాష్ట్ర ప్రభుత్వ ప్రధాన కార్యదర్శి కె. విజయానంద్ కేంద్ర ప్రభుత్వానికి సమర్పించిన నివేదిక ప్రకారం, మొంథా తుపాను ప్రభావం తీవ్రంగా ఉంది.

ప్రభావిత ప్రాంతాలు: 1,434 గ్రామాలు, 48 పట్టణ ప్రాంతాలు తుపాను ధాటికి అతలాకుతలమయ్యాయి.
అత్యధిక వర్షపాతం: 161 మండలాల్లో కుంభవృష్టి కురిసింది.

“టెక్నాలజీ ఆధారిత రియల్-టైమ్ పర్యవేక్షణ, ఉత్తమ పద్ధతులతో ప్రజల ప్రాణాలను కాపాడటంలో విజయం సాధించాం, కానీ ఆస్తి నష్టం జరగడం దురదృష్టకరం,” అని ముఖ్యమంత్రి ఎన్. చంద్రబాబు నాయుడు పేర్కొన్నారు.

సింహభాగం రోడ్లకే : మొత్తం నష్టంలో సింహభాగం మౌలిక వసతులకే, ముఖ్యంగా రహదారులకే వాటిల్లింది.
ఆర్ అండ్ బీ రోడ్లు: 4,794 కిలోమీటర్ల రోడ్లతో పాటు, 311 కల్వర్టులు, వంతెనలు ధ్వంసం కాగా, వాటిల్లిన నష్టం రూ.2,794 కోట్లు.
పంచాయతీరాజ్ రోడ్లు: 862 కిలోమీటర్ల గ్రామీణ రోడ్లు, సంబంధిత నిర్మాణాలు దెబ్బతినడంతో రూ.454 కోట్ల నష్టం జరిగింది.
పట్టణ మౌలిక వసతులు: పట్టణ ప్రాంతాల్లో మౌలిక వసతులకు రూ.109 కోట్ల నష్టం వాటిల్లినట్లు అంచనా.

అన్నదాతకు అంతులేని శోకం : ఈ తుపాను అన్నదాతను నిలువునా ముంచేసింది.
వ్యవసాయ పంటలు: 1.74 లక్షల మంది రైతులకు చెందిన 1.38 లక్షల హెక్టార్లలో పంటలు దెబ్బతిన్నాయి. అంచనా వేసిన నష్టం రూ.829 కోట్లు.
ఉద్యాన పంటలు: 23,979 మంది రైతులకు చెందిన 12,215 హెక్టార్లలో ఉద్యాన పంటలకు రూ.40 కోట్ల నష్టం జరిగింది.
ఆక్వా రంగం: ఆక్వా రంగానికి ఏకంగా రూ.514 కోట్ల నష్టం వాటిల్లింది.
పశు నష్టం: తుపాను కారణంగా 2,261 పశువులు మృత్యువాత పడ్డాయి.

ఇతర రంగాలపైనా తీవ్ర ప్రభావం..
విద్యుత్ శాఖ: 2,817 విద్యుత్ స్తంభాలు కూలిపోవడం, విద్యుత్ తీగలు తెగిపోవడంతో రూ.19 కోట్ల నష్టం వాటిల్లింది.
నీటిపారుదల శాఖ: సాగునీటి రంగానికి రూ.234 కోట్ల నష్టం జరిగింది.
గృహాలు: రాష్ట్రవ్యాప్తంగా 23 జిల్లాల్లో 3,045 ఇళ్లు పాక్షికంగా లేదా పూర్తిగా దెబ్బతిన్నాయి.
ఆరోగ్య శాఖ: అంగన్‌వాడీలు, ప్రాథమిక ఆరోగ్య కేంద్రాలు, సామాజిక ఆరోగ్య కేంద్రాలు దెబ్బతినడంతో రూ.122 కోట్ల నష్టం సంభవించింది.

సాంకేతికతతో ప్రాణరక్షణ : ప్రభుత్వం చేపట్టిన సహాయక చర్యల్లో భాగంగా, 1,36,907 మందిని 1,464 సహాయక శిబిరాలకు తరలించారు. వీరి కోసం రూ.32 కోట్లు ఖర్చు చేసినట్లు విజయానంద్ తెలిపారు. నీటిమట్టాలను పర్యవేక్షించేందుకు 602 డ్రోన్లను ఉపయోగించామని, ‘మన మిత్ర’ యాప్ ద్వారా ప్రమాదకర ప్రాంతాల్లోని ప్రజలకు 1.1 కోట్ల హెచ్చరిక సందేశాలు పంపామని సీఎం చంద్రబాబు వెల్లడించారు. నష్టంపై ప్రధాని నరేంద్ర మోదీతో మాట్లాడి, కేంద్ర సహాయం కోరనున్నట్లు ఆయన తెలిపారు.