Deputy CM Pawan Kalyan: ఉప ముఖ్యమంత్రి పవన్ కళ్యాణ్ కాకినాడ జిల్లాలోని ఉప్పాడ తీర ప్రాంతం ఎదుర్కొంటున్న సమస్యలపై అత్యున్నత స్థాయి సమీక్ష నిర్వహించారు. ఈ సందర్భంగా ఆయన కీలక నిర్ణయాలు తీసుకున్నారు. ముఖ్యంగా, మత్స్యకారుల జీవన ప్రమాణాలను మెరుగుపరచడం, తీరప్రాంత సమస్యలకు శాశ్వత పరిష్కారం చూపడం లక్ష్యంగా 100 రోజుల కార్యాచరణ ప్రణాళికను సిద్ధం చేయాలని అధికారులను ఆదేశించారు.
పవన్ కళ్యాణ్ ఈ సమీక్షలో శాస్త్రవేత్తలు, ఉన్నతాధికారులు, కాకినాడ కలెక్టర్, ఎస్పీలతో కలిసి కూలంకషంగా చర్చించారు. తీర ప్రాంత సంరక్షణ, మత్స్యకారులకు అదనపు ఆదాయ వనరులు కల్పించడంపై దృష్టి సారించారు.
“మత్స్యకారుల జీవితాల్లో మెరుగైన మార్పులు తీసుకువచ్చేందుకు సమగ్ర ప్రణాళికను రూపొందిస్తున్నాం,” అని ఉప ముఖ్యమంత్రి తెలిపారు. కేవలం సంప్రదాయ చేపల వేటపైనే కాకుండా, వారికి అదనపు ఆదాయ సముపార్జనకు మార్గాలు చూపడంపై ప్రత్యేక దృష్టి పెట్టాలని అధికారులను ఆదేశించారు.
తీర ప్రాంతంలో మత్స్య సంపద పెంపుదల, సముద్ర పర్యావరణ పరిరక్షణ కోసం నిపుణుల సలహాలు, సూచనలు స్వీకరించనున్నట్లు పవన్ కళ్యాణ్ వెల్లడించారు. ఈ 100 రోజుల ప్రణాళిక తీరప్రాంత ప్రజల ఆశలు, ఆకాంక్షలను ప్రతిబింబించేలా, వాస్తవ సమస్యలకు పరిష్కారం చూపించేలా ఉండాలని ఆయన స్పష్టం చేశారు. ఈ చొరవ ఉప్పాడ ప్రాంత మత్స్యకారుల భవిష్యత్తుపై కొత్త ఆశలను చిగురింపజేస్తోంది.
