Konaseema : ఆర్. అంబేద్కర్ కోనసీమ జిల్లా మల్కిపురం మండలం తూర్పుపాలెంలో గల సాంఘిక సంక్షేమ హాస్టల్ విద్యార్థులు తీవ్ర భయాందోళన వ్యక్తం చేస్తున్నారు. వారికి అందిస్తున్న ఆహారంలో నాణ్యత పూర్తిగా లోపించిందని, కుళ్లిన కూరలు, పురుగులు, గ్లాసు ముక్కలు, పెంకులు వస్తున్నాయని ఆరోపించారు. ఈ సమస్య కొత్తగా తలెత్తలేదని, గత కొంతకాలంగా ఇలాంటి ఆహారాన్నే అందిస్తున్నారని విద్యార్థులు వాపోయారు. గతరాత్రి భోజనం చేస్తుండగా ఒక విద్యార్థికి అన్నంలో గ్లాసు పెంకు తగలడంతో ఈ దారుణం బయటపడింది. వెంటనే విద్యార్థులు తమ తల్లిదండ్రులకు ఫోన్ చేసి విషయం చెప్పారు.
తల్లిదండ్రుల నిరసన, అధికారుల మౌనం
సమాచారం అందుకున్న తల్లిదండ్రులు హుటాహుటిన హాస్టల్‌కు చేరుకుని, వంట మనిషి, వాచ్‌మన్‌గా పనిచేస్తున్న అప్పన ప్రకాశ్‌ను నిలదీశారు. ప్రకాశ్ నిర్లక్ష్యం వల్లే ఈ పరిస్థితి ఏర్పడిందని, సరైన పరిశుభ్రత పాటించడం లేదని తల్లిదండ్రులు ఆగ్రహం వ్యక్తం చేశారు. తమ పిల్లల భవిష్యత్తు కోసం ప్రభుత్వం ఏర్పాటు చేసిన హాస్టళ్లలో ఇలాంటి దారుణమైన పరిస్థితులు ఉండటంపై వారు ఆవేదన వ్యక్తం చేశారు. అధికారులకు ఎన్నిసార్లు ఫిర్యాదు చేసినా పట్టించుకోవడం లేదని, ఈసారి కచ్చితంగా మంచి ఆహారం అందించాలని డిమాండ్ చేశారు.
ఈ విషయంపై హాస్టల్ వార్డెన్, ఇతర ఉన్నతాధికారుల నుంచి ఎలాంటి స్పందన రాలేదు. అయితే, ఈ ఘటనపై పూర్తి విచారణ జరిపి బాధ్యులపై కఠిన చర్యలు తీసుకుంటామని తూర్పుపాలెం సర్పంచ్ హామీ ఇచ్చారు. గతంలో కూడా ఇక్కడ ఇలాంటి సంఘటనలు జరిగాయని, నాసిరకం ఆహారంపై విద్యార్థులు అనేకసార్లు నిరసన వ్యక్తం చేసినా యాజమాన్యం పట్టించుకోవడం లేదని స్థానికులు తెలిపారు. దీనిపై ప్రభుత్వం వెంటనే స్పందించి, విచారణ జరిపి, విద్యార్థులకు నాణ్యమైన ఆహారం అందించాలని ప్రజలు కోరుతున్నారు. ఇలాంటి ఘటనలు పునరావృతం కాకుండా చూడాలని డిమాండ్ చేస్తున్నారు.
