Mahashivaratri Celebrations : విజయవాడ కనకదుర్గమ్మ కొలువైన ఇంద్రకీలాద్రి పర్వతంపై వెలిసిన పార్వతీ సమేత మల్లేశ్వరస్వామి వారి మహాశివరాత్రి బ్రహ్మోత్సవాలు అత్యంత వైభవంగా జరగనున్నాయి. ఈ నెల 13వ తేదీ నుంచి 20వ తేదీ వరకు వారం రోజుల పాటు ఈ ఉత్సవాలను నిర్వహించనున్నట్లు ఆలయ అధికారులు వెల్లడించారు. భక్తుల రద్దీని దృష్టిలో ఉంచుకుని అన్ని రకాల ఏర్పాట్లు పూర్తి చేస్తున్నారు.

శాస్త్రోక్తంగా ఉత్సవాల ప్రారంభం

ఉత్సవాల్లో భాగంగా తొలిరోజైన ఫిబ్రవరి 13న మల్లేశ్వరస్వామి , పార్వతీ దేవి ఉత్సవ మూర్తులను వధూవరులుగా ముస్తాబు చేస్తారు. శివపార్వతుల కళ్యాణానికి నాందిగా జరిగే ఈ అలంకరణోత్సవం భక్తులను విశేషంగా ఆకట్టుకుంటుంది. 15వ తేదీన స్వామివారికి విశేషంగా త్రికాల అభిషేకాలు నిర్వహిస్తారు. ఈ పూజల్లో పాల్గొనడం వల్ల సకల పాపాలు తొలగిపోతాయని భక్తుల నమ్మకం.

ముఖ్య ఘట్టాలు – కళ్యాణం , రథోత్సవం

శివరాత్రి ఉత్సవాల్లో అత్యంత కీలకమైన మహాన్యాసం, లింగోద్భవ కాల అభిషేకాలు శాస్త్రోక్తంగా జరగనున్నాయి. లింగోద్భవ కాలంలో స్వామివారిని దర్శించుకునేందుకు భక్తులు భారీగా తరలివచ్చే అవకాశం ఉంది. అనంతరం జగన్మాత పార్వతీ దేవి, పరమేశ్వరుల కళ్యాణోత్సవం కన్నులపండువగా నిర్వహిస్తారు. ఉత్సవాల్లో మరో ప్రధాన ఘట్టమైన స్వామివారి రథోత్సవం 16వ తేదీ సాయంత్రం జరగనుంది. విజయవాడ పురవీధుల్లో జరిగే ఈ రథోత్సవాన్ని తిలకించేందుకు వేలాది మంది భక్తులు తరలివస్తారు.

భక్తుల కోసం ప్రత్యేక ఏర్పాట్లు

శివరాత్రి పర్వదినం సందర్భంగా ఇంద్రకీలాద్రికి వచ్చే భక్తులకు ఎలాంటి ఇబ్బందులు కలగకుండా క్యూ లైన్లు, తాగునీరు , ప్రసాదం పంపిణీకి అధికారులు ఏర్పాట్లు చేస్తున్నారు. ఘాట్ రోడ్డు , మెట్ల మార్గంలో ప్రత్యేక విద్యుత్ అలంకరణలు చేయనున్నారు. మహాశివుని ఆశీస్సుల కోసం తరలివచ్చే భక్తులతో ఇంద్రకీలాద్రి శైవనామస్మరణతో మారుమోగనుంది.

 
Polytechnic: ఉద్యోగమే లక్ష్యంగా పాలిటెక్నిక్ ప్రక్షాళన.. 12 కొత్త కోర్సులు, 4000 అదనపు సీట్లు!