Laurs Labs : ఆంధ్రప్రదేశ్ ఫార్మా రంగంలో ఒక నూతన శకం మొదలైంది. ప్రముఖ ఫార్మా దిగ్గజం లారస్ ల్యాబ్స్ రాష్ట్రంలో భారీ పెట్టుబడి పెట్టేందుకు ముందుకు వచ్చి, ఏపీ ఆర్థిక వ్యవస్థకు ఒక ఊపునిచ్చింది. విశాఖపట్నం సమీపంలో అత్యాధునిక, భారీ ఉత్పత్తి కేంద్రాన్ని ఏర్పాటు చేయనున్నట్టు సంస్థ సీఈఓ డా. చావా సత్యనారాయణ ప్రకటించారు.
రూ.5,000 కోట్ల మెగా ప్లాన్.. 532 ఎకరాల కేటాయింపు
లారస్ ల్యాబ్స్ ప్రకటించిన ఈ మెగా ప్రాజెక్టు అంచనా వ్యయం దాదాపు రూ.5,000 కోట్లు. ఈ భారీ ప్లాంట్‌ను నెలకొల్పడానికి ఆంధ్రప్రదేశ్ ప్రభుత్వం ఇప్పటికే చకచకా అడుగులు వేసి, విశాఖపట్నం వద్ద ఏకంగా 532 ఎకరాల భూమిని కేటాయించింది.
సాక్షాత్తూ కంపెనీ సీఈఓయే ఇన్వెస్టర్స్ కాల్‌లో ఈ వివరాలను వెల్లడించడంతో, ఈ ప్రాజెక్టుపై మార్కెట్‌లో సానుకూలత పెరిగింది. ఈ మెగా యూనిట్‌ను అంతర్జాతీయ స్థాయి ప్రమాణాలతో నిర్మిస్తామని, దీని నిర్మాణం రాబోయే ఎనిమిదేళ్లలో దశలవారీగా పూర్తి అవుతుందని సత్యనారాయణ వివరించారు. అంతేకాకుండా, ప్రాజెక్టు విస్తరణ అవసరాలను బట్టి భవిష్యత్తులో ఈ పెట్టుబడి ఇంకా పెరిగే అవకాశం కూడా ఉందని ఆయన స్పష్టం చేశారు.
మైసూర్‌ నుంచి విశాఖకు భారీ యూనిట్ తరలింపు
ఈ ప్రాజెక్టు గురించి చెబుతూనే సీఈఓ సత్యనారాయణ మరో కీలక నిర్ణయాన్ని ప్రకటించారు. వాస్తవానికి కర్ణాటకలోని మైసూరులో ఏర్పాటు చేయాలనుకున్న తమ భారీ ఫెర్మెంటేషన్ యూనిట్‌ను సైతం ఇప్పుడు విశాఖపట్నంలోని ఈ కొత్త యూనిట్‌కు తరలించాలని నిర్ణయించారు.
ఈ తరలింపు నిర్ణయంతో, లారస్ ల్యాబ్స్ కార్యకలాపాలకు విశాఖపట్నం ఇకపై ప్రధాన కేంద్రంగా (Hub) మారనుంది. ఇప్పటికే హైదరాబాద్, ముంబై, బెంగళూరు, కాన్పూర్లలో తయారీ మరియు పరిశోధనా కేంద్రాలను కలిగి ఉన్న ఈ సంస్థకు, విశాఖలో రానున్న ఈ మెగా యూనిట్ అత్యంత కీలకమైనదిగా మారనుంది.
విశాఖ ఫార్మా డెస్టినేషన్‌గా..
లారస్ ల్యాబ్స్ వంటి ఒక ప్రముఖ సంస్థ రూ.5,000 కోట్ల పెట్టుబడి పెట్టడం వలన, విశాఖపట్నం కేవలం ఓడరేవు నగరంగానే కాకుండా, భారతదేశంలోని ఫార్మాస్యూటికల్స్ మ్యాప్‌లో కీలకమైన ‘ఫార్మా డెస్టినేషన్’గా మారుతుందని విశ్లేషకులు చెబుతున్నారు. ఈ పెట్టుబడి స్థానికంగా వేలాది మందికి ఉద్యోగ, ఉపాధి అవకాశాలను సృష్టించడంతో పాటు, ఏపీ జీడీపీ (GDP) వృద్ధికి కూడా గణనీయంగా దోహదపడనుంది.
లారస్ ల్యాబ్స్ గురించి: భారతదేశంలో సుమారు ఏడు వేలకు పైగా ఉద్యోగులు పనిచేస్తున్న ఈ సంస్థ, ఏపీలో ఈ భారీ విస్తరణ ద్వారా మరింత మంది యువతకు ఉపాధి కల్పించేందుకు సిద్ధమవుతోంది.
